محەمەدی حاجی مەحموود: پارتی ئەلفوبای سیاسەتی نەتەوەیی بە ڕۆڵەكانی كوردستان ئاشنا كرد
محەمەدی حاجی مەحموود، سەرۆكی پارتی سۆسیال دیموكراتی كوردستان، لە پەیامێكیدا كە ئاراستەی سەرۆك بارزانی كردووە، رای دەگەیەنێت، پارتی دیموكراتی كوردستان ئەفوبای سیاسەتی نەتەوەیی و نیشتمانی بە ڕۆڵەكانی خەڵكی كوردستان ئاشنا كرد.
ئەمەش دەقی پەیامەكەیەتی:
زۆر بەڕێز جەنابی سەرۆک مەسعود بارزانی
بە بۆنەی ( ٧٦ ) هەمین ساڵیادی دامەزراندنی پارتی دیموکراتی کوردستانەوە پیرۆزبایی لە جەنابتان و مەکتەبی سیاسی و ئەنجومەنی سەرکردایەتی و دۆست و لایەنگرانی پارتی دیموکراتی کوردستان دەکەین.
هێشتا تەپوتۆزی شەڕی دووەمی جیهانی نەنیشتبوە لە دابەشکردنەوەی دنیا لە دوای روخاندنی ئەمپراتۆریەتەکان، ئەو سەردەمەش زوڵم و غەدر لە کورد کرا، بەڵام پارتی دیموکراتی کوردستا وەک حزبێکی نەتەوەیی و نیشتیمانی دامەزراو ئەلفوبای سیاسەتی نەتەوەیی و نیشتیمانی بە ڕۆڵەکانی خەڵکی کوردستان ئاشناکرد و ئومێدێکی زۆری بە خەڵکی کوردستان بەخشی و بەردی بناغەی شۆڕش و کوردایەتی لەسەر دامەزرا، ئەمڕۆش ئەو یادە پیرۆزە دەکرێتەوە لە ژێر ئاڵای کوردستاندا، حکومەت و پەرلەمان و قەوارەی سیاسی هەرێم لە هەموکاتێک زیاتر پێویستی بە یەکڕیزی ماڵی کوردستانی و یەک هەڵوێستی سیاسی هەموو هێزەکان هەیە بۆ پاراستنی دەستکەوتەکانی گەل و نیشتیمان، ئەوەش هیمەت و ئەرکی گەورەی لەسەر بەڕێزتانە وەک هەمیشە، کێشەکانی ڕۆژهەڵاتی ناوەڕاست و ناوچەکە و ئاڵۆزیەکانی بەغداد ئەوەمان لێ داوا دەکات.
هیوایەکی زۆرمان هەیە ئەو یادە مێژویە ببێتە هاندەرێ بۆ یەکخستنی ماڵی کوردستانی و پیکەوە ژیانی سیاسی. جارێکی کە هیوای سەرکەوتن و بەرەو پێشچوونی حزبە تێکۆشەرەکەتانین.
لەگەڵ ڕێزماندا
دڵسۆزتان
محەمەد حاجی مەحمود
١٦ ی ئابی ٢٠٢٢
