سەرۆك بارزانی بۆچی بە حاكمێكی گوت: ئەی خیائین، تۆ خیانەتت لە پیشەكەت كرد

سەرۆك بارزانی ئاشكرای دەكات كە بەهۆی فێڵێكی یەكێتیی نیشتمانیی كوردستانەوە، دادوەرێك دەستكاریی ئەنجامی هەڵبژاردنەكانی كردووە، بەم هۆیەشەوە ئەو بە “خائین” وەسفی كردووە، لەپای ئەمە، دادوەرەكە گریاوە و گوتوویەتی خۆم دەكوژم.

لە لاپەڕە 118 و 119ی بەرگی پێنجەمی كتێبی (بارزانی و بزووتنەوەی ڕزگاریخوازی كورد. راپەڕین، دەرفەت و ئاستەنگەكان) كە تایبەتە بە گێڕانەوەی ڕووداوەكانی نێوان ساڵانی 1991 – 2002، سەرۆك بارزانی باسی لە فێڵێكی یەكێتی كردووە و ئاشكرای كردووە كە لە كاتێكدا دەبوایە ئەنجامی هەڵبژاردنەكانی ساڵی 1992ی پەرلەمانی كوردستان، بە ڕێژەی 51% بۆ پارتی و 49% بۆ یەكێتی رابگەیەندرێت هەروەك پارتی و یەكێتی لەسەری ڕێک کەوتبوون، یەكێتی ”فێڵ“ێكی كردووە و ”هێشتا حوبری ڕێككەوتنەكە وشك نەببووەوە، یەكێتی بە نهێنی چەتۆ حەوێزییان ناردە لای حاكم ئەمیر حەوێزیی سەرۆكی لێژنەی هەڵبژاردنەكان و ئاگاداریان كردەوە كە پارتی و یەكێتی ڕێك کەتوون و ئێستا سەركردایەتی هەردوولایان دێنە هەولێر بۆ ئەوەی تۆ ئەنجامی هەڵبژاردنەكان رابگەیەنیت بە شێوەیەك كە پەنجا بە پەنجا بێت نە (51% بە 49%).

هەروەك روونی كردۆتەوە، حاكم ئەمیر هات و لەبەرچاوی هەموو لایەنەكان و كەناڵەكانی راگەیاندنە ناوخۆیی و جیهانییەكان، ئەنجامەكانی راگەیاند. جارێكی تر تووشی قەیرانێكی تر بووینەوە. كەوتینە دووڕیانێكی ناخۆش. ئەگەر دەنگ بكەین و ئەنجامەكان رەت بكەینەوە، بێهیواییەكی زۆر گەورە دروست دەبێت و لەبەرچاوی دنیا سووك و ڕیسوا دەبین. ئەگەر بێدەنگی هەڵبژێرین ئەوە فێڵێكی گەورە كراوە و جارێكی تر پێشێلكاری ڕووی داوە.

سەرۆك بارزانی ئاشكرای كردووە: كاتێك بانگی حاكم ئەمیرم كرد و هۆكارەكەم لێ پرسی، لە وەڵامدا گوتی: بەخوا چەتۆ حەوێزی هاتە لام و پێی گوتم پارتی و یەكێتی ڕێك کەوتوون، كارێك بكە ئەنجامەكان وەك یەك بن، منیش لەسەر ئەم بنەمایە ئەنجامی چەند ناوەندێكی هەڵبژاردنم كە پارتی زۆرینەی دەنگەكانی هێنابوو، هەڵوەشاندەوە بۆ ئەوەی ئەنجامەكان بەم شێوەیە بڵاو بكەینەوە.

هەر لە كتێبەكەیدا، سەرۆك بارزانی نەیشاردۆتەوە كە پاش ئەوەی وەڵامەكەی بیستووە، زۆر توڕە بووە و نووسیویەتی: ”منیش زۆر لێی تووڕە بووم و پێم گوت: ئەی خائین، تۆ خیانەتت لە پیشەكەت و لەو متمانە و ئەمانەتە كرد كە پێمان بەخشیبووی. دوای ئەم قسانە، دەستی بە گریان كرد و گوتی: خۆم دەكوژم، چونكە نەمزانی بەم شێوەیەیە. زۆر پاڕایەوە و تكایەكی زۆری كرد و گوتی: ئێستا دەڕۆم و ڕاستییەكان دەڵێم و ئاشكرای دەكەم. منیش پێم گوت: تازە تەواو، ڕۆیشت. لە كۆتاییدا بە ناچاری ڕەشنووسی پەنجا بە پەنجا پەسەند كرا، چونكە بۆ ئەو سەردەم و بارودۆخ و قۆناغە هیچ ڕێگاچارەیەكی تر نەبوو. ئەمە ئیجابیاتی خۆیشی هەبوو، چونكە شەڕ ڕووی نەدا و ناوبانگ و سومعەی گەلەكەمان لە بەردەم چاوی جیهان پارێزرا و نەشكا.