سەركردەیەكی هەسەدە لە رۆژئاوای كوردستان بە هۆی هەڕەشەكانی پەكەكە ریزەكانی هەسەدەی جێ هێشتوو خۆی گەیاندە پاریس
دوای ئەوەی بەشێك لە سەركردەكانی هێزەكانی سوریای دیموكراتیك لە رۆژئاوای كوردستان رایانگەیاند بووە كە لەشكركێشی و هێرشەكانی توركیا بۆ سەر رۆژئاوا بە هۆی سیاسەتی هەڵەی پەكەكەیە، لە ئێستادا پەكەكە هەڕەشە لەچەند سەركردەیەكی هێزەكانی هەسەدە دەكات و بە هۆیەوە چەند سەركردەیەك ریزەكانی هەسەدە جێ دەهێڵن و چوونەتە ئەورووپا.
بە پێی زانیارییەكانی دەزگای میدیایی خواكوڕك پۆلات جان كە بە كەسی دووەمی نێو ریزەكانی هەسەدە دادەنرێت و دەستەڕاستی مەزلوم عەبدی بوو، لە ماوەی رابردوو لەگەڵ هاوپەیمانان واژووی لەسەر رێككەوتنێك كردووە كە چیتر ئاڵاو وێنەی ئۆجەلان لە رۆژئاوا لەسەر دام و دەزگا میریەكان بەرز نەكرێنەوە، دوای رێككەوتنەكە پەكەكە هەڕەشەی لەو سەركردەیەكردووە.
سەرچاوەی زانیارییەكانی خواكوڕك زیاتر روونی كردەوە: سه‌ركردایه‌تی په‌كه‌كه داوایان لە پۆلات جان كردووه كه سه‌ردانی قه‌ندیل بكات، به‌ڵام ئه‌و به‌ده‌م داواكارییه‌كه‌وه نه‌چووه، هۆكاری بانگهێشتنه‌كه‌یش دوای ئه‌وه بووه كه پۆلات جان په‌یماننامه‌یه‌كی واژووكردووه و به‌ڵێنی به هاوپه‌یمانان داوه كه هه‌موو هه‌وڵه‌كانی خۆی بخاته‌گه‌ڕ، بۆ ئه‌وه‌ی چیتر ئاڵای په‌كه‌كه و وێنه‌ی عه‌بدوڵا ئۆجه‌لان له ڕۆژئاوا به‌رز نه‌كرێته‌وه و بیانوو له‌و ڕێگه‌یه‌وه نه‌درێته ده‌ست توركیا بۆ ئه‌وه‌ی هێرشی تری داگیركاری بكاته سه‌ر ڕۆژئاوای كوردستان.
ئەو سەرچاوەیە گوتیشی پۆلات جان دەیزانی بانگهێشتكردنی بۆ قەندیل بە مەبەستی لێپێچینەوە و سزادان بوووە پۆلات جان ترسی ئه‌وه‌ی هه‌بووه كه چاره‌نووسی هاوشێوه‌ی جوان ئیبراهیم و دوزدار حه‌مۆ و فه‌رهاد دێریك و ئه‌وانی تر بێ و له‌ناوی ببه‌ن و كۆتایی به ژیانی بهێنن، بۆیە داواكەی رەتكردووەتەوە.
هەروەها گوتیشی پۆلات جان بە هۆی مەترسی لەسەر ژیانی په‌نای بردووه‌ته به‌ر بنكه‌یه‌كی سه‌ربازی فەڕه‌نسا له ڕۆژهه‌ڵاتی فورات و داوای په‌نابه‌ری سیاسی له فڕه‌نسا كردووه، داواكه‌ی قبووڵكراوه و ده‌سبه‌جێ به فڕۆكه‌یه‌كی جه‌نگی بۆ ئوردن گوێزراوه‌ته‌وه و له‌وێوه‌یش به فڕۆكه‌ی مه‌ده‌نی گه‌یشتووه‌ته پاریسی پایته‌ختی فڕه‌نسا.
