وەزارەتی کارەبا: لە وەرزی زستان بەرهەمهێنانی کارەبا زیاد دەکرێت
وەزارەتی کارەبای حکومەتی هەرێمی کوردستان ئاشکرای دەکات: وەرزی زستان بەرهەمهێنانی کارەبا زیاد دەکرێت.
لە راگەیاندراوێكدا ئەمڕۆ پێنج شەممە، وەزارەتی كارەبای حكومەتی هەرێمی كوردستان، رای گەیاند،ئەمڕۆ کەمال محەمەد ساڵح، وەزیری کارەبا سەردانی بەڕێوەبەرایەتیی گشتیی کارەبای هەولێری کرد و لەگەڵ بەڕێوەبەران و فەرمانگەکانی کارەبای هەولێر کۆبووەوە.
وەزارەتەکە راشیگەیاندووە:” لە کۆبوونەوەکەدا ئەم بڕیارانەی خوارەوە دران:
– بۆ وەرزی زستان بەرهەمهێنانی کارەبا زیاد دەکرێت.
– هەڵمەتی نەهێشتنی سەرپێچیەکان فراوان دەکرێت.
– جەخت لەسەر وەرگرتنی كرێی کارەبا کرایەوە.
– کار بۆ کەمکردنەوە و چارەسەری بارزۆری لەسەر تۆڕەکانی کارەبا دەکرێت.
– دوو وێستگەی مۆبایل بۆ پارێزگای هەولێر دابین دەکرێت.
– دەوامی دوای نیوەڕوان تا کاتژمێر 5ی ئێوارە بۆ بەشی فرۆشتنی وزە دەکرێتەوە.
