نووسەرێکی یەکێتی: پەکەکە دەستکەلای دەزگا سیخووڕییەکانە و خۆیان کردووەتە کەڵەگا بەسەر کوردەوە
نووسەرێکی سەر بە یەکێتی دەلێت: پەکەکە دەستکەلای دەزگا سیخووڕییەکانە و خۆیان کردووەتە کەڵەگا بەسەر کوردەوە
بەرزان عوسمان، نووسەر و چاودێری سیاسی كادیری راگەیاندنی یەكیتیی نیشتمانی كوردستان، لە ئاکاونتی تایبەتیی خۆی، پۆستێکی لەسەر چەکدارەکانی پارتی کرێکارانی کوردستان (پەکەکە) بڵاو کردووەتەوە و دەڵێت: “پارتی کارکەرانی کوردیی تورکیی (الحزب العمال الکردي الترکي) بوونەتە کەڵەگای کورد، ئەم دەسکەلا و دروستکراوانەی میت لە هەموو جێگەیەک تەنیا خۆیان کوێخا رینگۆن. لە کوردستانی تورکیاش چونکە جێگەیان نابێتەوە، ھەرچیی سیاسەتمەداری وەک کاک سەڵاحەدین دیمرتاش ھەیە، بەگرتنی دەدەن، بۆ ئەوەی لە بەندیخانەکانی تورکیادا بەند بکرێن و هیچ حزب و سەرکردەیەکی راستەقینەی بزووتنەوەی رزگاریخوازی کورد لەو پارچەیەدا هەڵنەکەوێت، تاوەکوو مەسەلەی کورد لەو وڵاتە و بەشەکانی دیکەی کوردستان، هەر بە چارەسەرنەکراوی بمێنێتەوە،”
دەشلێت:” تا ئەو چەکدارە تێرۆریستانەی دەستکەلای دامودەزگا جاسووسی و سەربازییەکانی تورک بمێنن، هیچ کام لە بەشەکانی کوردستان و کورد دەرفەتی رزگار بوون و شاد بوون بە مافەکانی بۆ ناڕەخسێت.“
ئەو نووسەرەی یەکێتی دەشنووسێت: پەکەکە بە تریاکی گەمژاندن، چەواشە، خۆڵکردنە چاوی خەڵک و بەکوشتدانی خەڵکی کوردپەروەری راستەقینە و دڵسۆز، لە مەیدانێکی فراواندا تەراتێنیانە، کەچی لە بستێک خاکی کوردستانی تورکیا جێگەیان نییە و کەس داڵدەیان نادات.
دەشلێ:” بەداخەوە یەکێتیی نیشتمانیی کوردستان، لەم ساڵانەی دواییدا هەڵخەڵەتێنرا و بوو بە بەشێک لەو تاقمە! سەرەنجامەکەشی ئەوەیە، هەر رۆژەی درۆن و فڕۆکەیەکی تورکیای فاشیست لە شوێنێک تەراتێن دەکەن و ناوچەیەک وێران دەکەن.
ئاماژەی بەوەش کردووە، خودی خۆم تاوەکوو ساڵی ١٩٨٧ زۆر سۆزم بۆ پەکەکە هەبووە، وەک چۆن سۆزم بۆ کۆمەڵەی زەحمەتکێشان و حزبی دیموکرات هەبووە، بەڵام کە چەند کەسێکی ناو پەکەکەم دواند، ئیتر زانیم ئەمانە کێن! ساڵی ١٩٩١ تورکیای فاشی رێگەی دەدا بە کاروانەکانی فریاگوزاریی نێوەدەوڵەتی، تاوەکوو یارمەتیی کۆمەک بگەیەننە کوردی خێوەتگەکان لە کوردستانی عێراق، کەچی ئەو قارەمانانە رێگایان لێ دەگرت!
