حکومەت چەندان پڕۆژەی گرنگ و ستراتیجی لە سنووری هەڵەبجە و دەربەندیخان و بالیسان جێبەجێ دەکات
حکومەتی هەرێمی کوردستان رایدەگەیێنێت : بەمنزیکانە چەندان پڕۆژەی گرنگ و ستراتیجی لە سنووری هەڵەبجە و دەربەندیخان جێبەجێ بكرێ.
لە راگەیەنراوێكدا کە وێنەیەکی دەست دەزگای میدیایی خواکوڕك کەوتووە تێدا وەزارەتی ئاوەدانكردنەوە و نیشتەجێكردن رای گەیاندووە، “بەردی بناغەی پڕۆژەی پرد و رێی توەقوت لە پارێزگای هەڵەبجە دادەنرێت، بەخۆشحاڵییەوە بە هاووڵاتییانی هەرێمی كوردستان و بەتایبەت پارێزگای هەڵەبجە رادەگەیەنین، لە ماوەیەكی نزیكی داهاتوودا بەردی بناغەی پڕۆژەی پردو رێی توەقوت لە پارێزگای هەڵەبجە دادەنرێت و دەچێتە بواری جێبەجێكردنەوە.
راشیگەیاندووە، وەك پێشتر بەڵێنمان دابوو، لە ئایندەیەكی نزیكدا پڕۆژەی رێی ناوتاق لە دەربەندیخان بە بەڵێندەر رادەسپێرێت، بۆ ئەوەی تا دروستكردن و تەواوبوونی تونێلی دووەمی دەربەندیخان، وەك رێیەكی جێگرەوە هاووڵاتییان سوودی لێ ببینن.
ئەوەیش ئاشكرا كراوە، وەك بەشێكیش لە جێبەجێكردنی داخوازی و داواكاری هاووڵاتییانی سنوورەكە و وەك پێشتر بەڵێنمان دابوو، لە ماوەیەكی نزیكدا پڕۆژەی نۆژەنكردنەوەی رێی دۆڵی بالیسان دەچێتە بواری جێبەجێكردنەوە.
لە راگەیەنراوەكەی وەزارەتی ئاوەدانكردنەوە و هەروەها هاتووە، بەردەوام دەبین لە هەوڵەكان بۆ خزمەتكردنی هاووڵاتییان، لەو چوارچێوەیەشدا موژدە بە هاووڵاتییانی خۆشەویست دەدات، جگە لەو پڕۆژانە لە ئایندەیەكی نزیكدا ژمارەیەك پڕۆژەی تری گرنگ و پێویست لە سەرجەم ناوچە جیاجیاكانی هەرێمی كوردستان بانگەوازی بۆ دەكرێت و بەپێی یاساو رێنوێنییەكان دەچنە بواری جێبەجێكردنەوە.
