وەزارەتی پێشمەرگە : رۆژی دووەمی ئۆپەراسیۆنی هێزەکانی پێشمەرگە، لە سنووری ناوچەی قەرەحەسەن بەڕێوەچوو.
بە مەبەستی راوەدوونانی تیرۆریستان و پاككردنەوەی چەند ناوچەیەك لە داعش، وەزارەتی پێشمەرگە ئۆپراسیۆنێكی دەست پێكردوو، ئەمڕۆش رایگەیاند ، رۆژی دووەمی ئۆپەراسیۆنی هێزەکانی پێشمەرگە، لە سنووری ناوچەی قەرەحەسەن بەڕێوەچوو.
وه‌زاره‌تی پێشمه‌رگه‌ی حكومه‌تی هه‌رێمی كوردستان، راگه‌یه‌ندراوێكی بڵاوكرده‌وه، تێیدا هاتووه: سەر لە بەیانی ئەمڕۆ (چوارشه‌ممه 14ـی ئەیلوولی 2022)، لە میحوەری چواری هێزەکانی پێشمەرگە، بۆ دووەم رۆژ ئۆپەراسیۆنی کێوماڵکردنی سنووری ناوچەی قەرەحەسەن، لە گوندەکانی سیامەند سوور، قشڵاخ، فەرقان، پەڵکانە، بزڵە و شێخ جیری بەردەوامبوو.
ئۆپەراسیۆنەکە، لە دوو قۆڵەوە دەستیپێکرد و ماوەی شەش کاتژمێر و نیو بەردەوام بوو، کە تێیدا یەکەکانی سەر بە لیوای 22ـی پیادەی وەزارەتی پێشمەرگە بەشداربوون.
ئەم ئۆپەراسیۆنە دوای ئەوە دێت، تیرۆریستانی داعش لەرێگەی تۆڕە کۆمەڵایەتییەکانەوە ترس و دڵەڕاوکێیان لەناو هاووڵاتیانی ناوچەکەدا بڵاوکردبووه‌وه، بۆ دڵنیاکردنەوە و نەهێشتنی مەترسی و پاراستنی هاووڵاتیانی ناوچەکە، هێزەکانی پێشمەرگە ئەو ئۆپەراسیۆنەیان ئەنجامدا، کە کێوماڵی تەواوی ناوچەکەیان کرد و هێزی زیاتری پێشمەرگە لە سنوورەکە جێگیر دەکرێت.
