بەسەرپەرشتی نێچیرڤان بارزانى و بە ئامادەبوونی مەسرور بارزانی یاداشتێكى لێكگه‌یشتنى وه‌زاره‌تى پێشمه‌رگه و پێنتاگۆن واژۆ کرا
پێشنیوه‌ڕۆى ئه‌مڕۆ چوارشه‌ممه 2022/9/21 له ڕێوڕه‌سمێكدا به سه‌رپه‌رشتیى نێچیرڤان بارزانى، سه‌رۆكى هه‌رێمى كوردستان و به ئاماده‌بوونى مه‌سروور بارزانى، سه‌رۆكی حکومەتی هه‌رێمى كوردستان و خاتوو سێلێست واڵنده‌ر، یاریده‌ده‌رى وه‌زیرى به‌رگریى ئه‌مه‌ریكا بۆ كاروبارى ئاسایشى نێوده‌وڵه‌تى و شاندى یاوه‌رى و به‌ڕێزان جێگرانی سه‌رۆکی هه‌رێمی کوردستان، جێگری سه‌رۆک وه‌زیرانی هه‌رێمی کوردستان، باڵیۆزی ئه‌مه‌ریکا له عێراق، ژماره‌یه‌ک له وه‌زیران و ڕاوێژکارانی سه‌ربازی، یاداشتێكى لێكگه‌یشتن له‌نێوان وه‌زاره‌تى پێشمه‌رگه و وه‌زاره‌تى به‌رگریى ئه‌مه‌ریكادا واژۆ كرا.
له ڕێوڕه‌سمه‌كه‌دا نێچیرڤان بارزانى سەرۆکی هەرێمی کوردستان ، وته‌یه‌كى پێشكه‌ش كرد و تیایدا ئاماژه‌ى به قاره‌مانیه‌تیى پێشمه‌رگه له شه‌ڕى دژى تیرۆر كرد و تیشكى خسته سه‌ر پشتگیریى ئه‌مه‌ریكا و هاوپه‌یمانان له عێراق و هه‌رێمى كوردستان بۆ تێكشكاندنى داعش.
سه‌رۆكى هه‌رێمى كوردستان هه‌روه‌ها جه‌ختیى له هاوكارى و هه‌ماهه‌نگیى نێوان پێشمه‌رگه و سوپاى عێراق بۆ به‌ره‌نگاربوونه‌وه‌ى مه‌ترسییه‌كانى تیرۆر كرده‌وه و بۆ ئه‌و مه‌به‌سته سوپاسى به‌ڕێز مسته‌فا كازمى، سه‌رۆك وه‌زیران و فه‌رمانده‌ى گشتیى هێزه چه‌كداره‌كانى عێراقى كرد.
له وته‌كه‌یدا نێچیرڤان بارزانى سەرۆکی هەرێمی کوردستان جه‌ختى له پابه‌ندیى هه‌رێمى كوردستان به هاوبه‌شێتى له‌گه‌ڵ ئه‌مه‌ریكا كرده‌وه و سوپاسى ئه‌مه‌ریكا و وڵاتانى دۆستى كرد بۆ هاوكارى و پشتگیرییان له چاكسازییه‌كانى وه‌زاره‌تى پێشمه‌رگه و پرۆسه‌ى یه‌كخستنه‌وه‌ى پێشمه‌رگه.
