ئێران : قبوڵی ناکەیین گرووپەدژبەرەکانی ئێران لە عێراق و هەرێمی کوردستاندا بمێننەوە
ماڵپەڕی فەرمی وەزارەتی دەرەوەی ئێران ئاشکرای دەکات وەزیری دەرەوەی ئێران لە پەیوەندییەکی تەلەفۆنیدا بە فوئاد حوسێنی ڕاگەیاندووە “چیدیکە قبووڵی ناکەین هەڕەشەی ئەو گرووپانەمان لەسەربێت کە لە هەرێم داڵدەدراون
رۆژی هەینی 7-10-2022 ماڵپەڕی فەرمی وەزارەتی دەرەوەی ئێران بڵاوی کردووەتەوە، ئەمیرعەبدوڵڵاهیان، وەزیری دەرەوەی ئێران، بە تەلەفۆن قسەی لەگەڵ د. فوئاد حوسێن، وەزیری دەرەوەی عێراق کردووە، تاوتوێی بۆردوومان و هێرشەکانی ئەمدواییەی ئێرانیان بۆ سەر خاکی هەرێمی کوردستان کردووە.
لە بەشیکی دیکەدا ئاماژەی بەوە کردووە ، وەزیری دەرەوەی ئێران رایگەیاندووە: “دوای تێپەڕبوونی چوار دەیە و سەرباری بەڵێنە یەک لەدوای یەکەکانی بەرپرسانی هەرێم [هەرێمی کوردستان]، بەداخەوە چالاکیی گرووپە چەکدارەکان لە خاکی هەرێمەوە دژی ئاسایشی نیشتمانیی ئێران، هێشتا بەردەوامە”.
لە کۆتاییشدا حوسێن ئەمیرعەبدوڵڵاهیان دووپاتیکردووەتەوە: “سەرباری رێزگرتن و پابەندبوونمان بە پەرەپێدانی پەیوەندییە باڵاکانی نێوان هەردوو وڵات، هەروەک بەرپرسانی باڵای سەربازی کۆماری ئیسلامیی ئێران جەختیان کردووەتەوە، ئێمە بەردەوامبوونی دەستدرێژیکردن و هەوڵە تیرۆریستییەکانی ئەو گرووپانەی لە هەرێم گیرساونەتەوە و ئاسایشی نیشتمانیی ئێرانیان کردووەتە ئامانج، قبووڵ ناکەین”.
