یه‌كگرتوو:ئەو كەسانەی كە ناو دەنوسن بۆ حه‌شدی شه‌عبی كەسی حیزبی و دیارن و سەربەحیزبێكی دیاریكراون.!
خواكوڕك
پاش بڵاو بونەوەی دەنگۆی ناوسین بۆ ڕیزەكانی حەشدی شەعبی لە سنوری پارێزگای هەڵەبجە بەرپرسی مه‌ڵبه‌ندی 5ی یەكگرتوو دەڵێت” پێویستە حكومەت و حیزبەكان نەهێڵن هیچ جۆرە چەكدارێكی تر بێجگە لەپێشمەرگە سەرهەڵبدات چونكە ئەمە هەنگاوێكی مەترسیدارە .
(حەسەن شێخ عبدوالله) ئەندامی سەركردایەتی و بەرپرسی مەڵبەندی پێنجی یەكگرتووی ئیسلامیی كوردستان لە لێدوانێكیدا بۆ ماڵپه‌ڕی حزبه‌كه‌ی ڕایگەیاندوه” ئەو هەواڵانەمان بیستووە كە كەسانێك هەن ناونوسی گەنجان دەكەن بەناوی حەشدی شەعبی یان حەشدی كوردی، پێمان وایە ئەمە هەنگاوێكی خراپە، چونكە ئەمە وڵات بەرەو میلیشیاگەری دەبات، پێویستە لایینی پەیوەندی دارەكان نەهێڵن هیچ جۆرە چەكدارێكی تر بێجگە لەپێشمەرگە سەرهەڵبدات و رێگە نەدرێت دیاردەی چەكداری دروست بێت لەژێر هیچ ناو و ناونیشانێكدا .
ئەو ئەندامەی سەركردایەتی یەكگرتوو ڕاشیگەیاند : وەك یەكگرتووی ئیسلامیی كوردستان زانیاریمان نیە هیچ حیزبێك لەپشتی ئەو هەنگاوە بێت، بەڵام ئەو كەسانەی كە ناو دەنوسن كەسی حیزبی و دیارن و سەربەحیزبێكی دیاریكراون.
بەرپرسی مەڵبەندی پێنجی یەكگرتووی ئیسلامیی كوردستان ئاماژەی بۆئەوەكرد: ئەم بابەتە لەزۆرێك لەشوێنەكانی تریش هەیە وەكو كەلار و چەمچەماڵ و سلێمانی و رانیە.
