مامۆستا ڕفێنراوه‌كه‌ی حاجیاوا نه ده‌نگی هه‌یه نه ڕه‌نگ.
خواكوڕك
ده‌سته‌ی مافی مرۆڤی هه‌رێمی كوردستان به‌دواداچون بۆ مامۆستا ڕفێنراوه‌كه‌ی حاجیاوا ده‌كات به‌ڵام تا ئێستا هیچ سه‌ره‌داوێك له باره‌ی ڕفاندنیه‌وه نیه.
كاتژمێر (8) ی شه‌وی 2017/3/19 گروپێكی چەکدار به‌دوو ئۆتۆمبیل هه‌ڵیانكوتایه سه‌ر مزگه‌وتی ” شێنێ”یانی له‌ناحیه‌ی حاجیاواو (مەلا سدیق خۆشناو) مامۆستای ئایینی ئه‌و مزگه‌وته‌یان رفاند و تا ئێستاش بێ سه‌روشوێنه‌وه و هیچ هه‌واڵێك له باره‌یه‌وه نیه و ئاسایشی ناوچه‌كه‌ش هه‌واڵه‌كه پشتڕاسده‌كاته‌وه ده‌لێن” ئێمه‌ش نازانین كێ ڕفاندویه‌تی.!
وته‌بێژی فه‌رمی ده‌سته‌ی مافی مرۆڤ له‌به‌یاننامه‌یه‌كدا كه وێنه‌یه‌كی بۆ (خواكوڕك) نێردراوه و تێیدا هاتوه” له‌گه‌ڵ بیستنی هه‌واڵه‌كه ده‌ستمان كرد به به‌دواداچون و بۆ ئه‌و مه‌به‌سته، نوسینگه‌ی ڕاپه‌رینی ده‌سته‌مان راسپارد بۆ به‌دواداچون و په‌یوه‌ندیكردن به‌لایه‌نی په‌یوه‌ندیدار”.
دوێنێ تیمێكی نوسینگه‌ی راپه‌رینی ده‌سته‌كه سه‌ردانی ئاسایشی حاجیاوای كردو پێكه‌وه له‌باره‌ی دۆسیه‌كه‌وه گفتوگۆیان كرد.
لای خۆیانه‌وه ئاسایشی ڕاپه‌رین و حاجیاوا جه‌ختیانكرده‌وه، “ئاگاداری ئه‌و بابه‌ته‌ن به‌ڵام به‌هیچ شێوه‌ك كاری ئه‌وان نه‌بوه‌و ئه‌گه‌ر هه‌ر كه‌سێك كێشه‌ی هه‌بێت یان داواكراو بێت ئێمه به‌فه‌رمی داوای ده‌كه‌ین نه‌وه‌ك به‌و شێوه بچینه سه‌ری و بیبه‌ین.
