دەنگدان بۆ هەڵبژاردنی ئەندامانی سەرکردایەتی پارتی دەستپێدەکات
![](https://xwakurk.com/wp-content/uploads/2022/11/20221103_114224.png)
دووەم رۆژی بەڕێوەچوونی کۆنگرەی پارتی دیموکراتی کوردستان، پرۆسەی دەنگدان بۆ هەڵبژرادنی ئەندامانی سەرکردایەتی دەستپێدەکات.
بەگوێرەی بەنامەی کاری کۆنگرەی 14ی پارتی دیموکراتی کوردستان، ئەمڕۆ هەینی 4/11/2022، کە دووەم رۆژی بەڕێوەچوونی کۆنگرەیە کاتژمێر 10ی سەر لە بەیانی دانیشتنی یەکەم دەستپێدەکات و راپۆرتی لیژنەکان دەخوێندرێتەوە.
لە دانیشتنی دووەمی ئەمڕۆی کۆنگرەی 14ی پارتی کە بەگوێرەی بەرنامەی کار کاتژمێر 2ی پاشنیوەڕۆ بەڕێوەدەچێت، ناوی کاندیدەکان دەخوێندرێتەوە و پرۆسەی دەنگدان بۆ هەڵبژاردنی ئەندامانی ئەنجومەنی سەرکردایەتی پارتی دەستپێدەکات.
وەک لە بەرنامەی کاری کۆنگرەی پارتی ئاماژەی پێکراوە، ئەمشەو پرۆسەی جیاکردنەوەی دەنگەکان و هەژمارکردن بەڕێوەدەچێت.
وەزیر سورچی ئەندامی کۆنگرەی پارتی رایگەیاند، بڕیارە ئەمڕۆ دەنگدان بۆ هەڵبژاردنی ئەنجومەنی سەرکردایەتی ئەنجام بدرێت.
ئاماژەی بەوەشدا، هەر لە چوارچێوەی کارەکانی رۆژی دووەمی کۆنگرەدا ژمارەیەک لە پێشمەرگە دێرینەکان و یاوەرانی بارزانی خەڵات دەکرێن.