شاندی حکومەتی هەرێمی کوردستان سەردانی بەغدا دەکات
پەرلەمانتارێکی فراکسیۆنی پارتی لە پەرلەمانی عێراق دەڵێت، رۆژی سێشەممە 08-11-2022 شاندێکی حکومەتی هەرێمی کوردستان سەردانی بەغدا دەکەن بۆ کۆبوونەوە لەگەڵ حکومەتی فیدراڵیی عێراق لەبارەی جێبەجێکردنی خاڵەکانی نێو رێککەوتننامەی هاوپەیمانیی بەڕێوەبردنی دەوڵەت.
دەشڵێت، رێککەوتنێک هەیە بۆئەوەی هاوشێوەی خولەکانی پێشوو ئەو لیژنانەی پەرلەمانی عێراق لەلای کورد بوون، وەکو خۆیان بمێننەوە.
شێروان دووبەردانی، پەرلەمانتاری فراکسیۆنی پارتی لە پەرلەمانی عێراق لە لێدوانێکدا بۆ دەزگای میدیایی خواکوڕک ئاشکرای کرد ، لە خولەکانی پێشووی پەرلەمانی عێراقدا، کورد سەرۆکایەتیی سێ لیژنەی لەلابوو، کە ئەوانیش لیژنەی یاسایی، لیژنەی هەرێم و پارێزگاکان و لیژنەی پەیوەندییەکانی دەرەوە بوون.
هاوکات ئاماژە بەوە دەکات ، گرنگترین لیژنە بۆ کورد، لیژنەی یاساییە، چونکە هەموو یاسایەک دێتە پەرلەمان هەنگاوی یەکەم لەلایەن لیژنەی یاساییەوە گفتوگۆی لەسەر دەکرێت و بڕیارە لەسەر ئاستی سەرۆک فراکسیۆنەکان کۆبوونەوەیەک بۆ بڕیاردان لەسەر دابەشکردنی سەرۆکایەتیی لیژنەکان بکرێت و گفتوگۆ لەسەر ئەو لیژنانە بکرێن کە پشکی کوردن، جا چ سەرۆک لیژنەکان یان جێگری سەرۆک لیژنە و بڕیاردەری لیژنەکان بن.
