جووتیار عادل: بە فەرمانی سەرۆکی حکوومەت کەمپەینی هاوکاری بۆ زیانلێکەوتوانی بوومەلەرزەکە بەڕێوە دەچێت
جوتیار عادل، گوتەبێژی حکومەتی هەرێمی کوردستان سەبارەت بە راگەیاندنی سێ رۆژ پشوو باسی لەوەکرد، ئەو سێ رۆژەی کراوەتە پشوو، بۆئەوەیە زیاتر لە دۆخی بوومەلەرزە ئاگاداربین، بە مەبەستی پاراستنی ژیان و سەروماڵی هاووڵاتیانی هەرێمی کوردستان لەئەگەری لێکەوتەکانی بوومەلەرزەکەی تورکیا و سووریا.
د. جووتیار عادل گوتیشی: حکوومەتی هەرێمی کوردستان ڕۆژانی 7 و 8 و 9ی ئەم مانگەی کردە پشوو بۆ ئەوەی زیاتر لە دۆخی ئەو بوومەلەرزەیە ئاگادار بین و لەسەر ڕاپۆرتی وەزارەتی گواستنەوە و گەیاندن ئەم بڕیارە درا بۆ پاراستنی سەر و ماڵی خەڵکی هەرێمی کوردستانیش لە ئەگەری لێکەوتەکانی ئەو بوومەلەرزەیەی لە تورکیا و سووریا ڕووی دا.
گوتەبێژی حکوومەت ئاماژەی بەوەش دا: هەر لەم چوارچێوەیەدا بەڕێز سەرۆکی حکوومەت پێشنیاری کەمپەینێکی کۆکردنەوە و گەیاندنی کۆمەک و هاوکاریی بۆ هەردوو وڵات خستە ڕوو و ئەنجوومەنی وەزیران پێشنیارەکەی پەسند کرد بۆ ئاراستەکردنی کۆمەک و هاوکارییەکان لەژێر سەرپەرشتیی پارێزگارەکان و سەرپەرشتی ئێدارە سەربەخۆکاندا.
گوتیشی: تیمەکانی ئێمە ئێستا لە تورکیا لە کارەکانی خۆیان بەردەوامن و نزیکەی 84 کارمەندی کەرتی تەندروستیی ئێمە چوون بۆ ئەوێ و هەوڵەکان بۆ گەیاندنی تیمی هاوکاری بۆ سووریاش بەردەوامن، بۆ سووریا هەندێک بەربەست هەن کە هیوادارین بەربەستەکان نەمێنن.
تیمی فریاگوزاری هەرێمی کوردستان لە 84 کەس پێکدێت و 25 ئۆتۆمبێلی فریاگوزاری بۆ ناوچە زیانلێکەوتووەکان نێردراون، هەروەها 30 پزیشک لە پسپۆڕییە جیاوازەکان رەوانەی تورکیا کراون.
رۆژی 6/2/2023 دوو بوومەلەرزە باکووری کوردستان و تورکیا، هاوکات بوومەلەرزەیەک رۆژئاوای کوردستان و سووریای هەژاند، کە گوڕی بوومەلەرزەکان لە سەرووی حەوت پلەی رێختەرەوە بوون، زیانی زۆری لێکەوتەوە تا ئێستا تیمەکان سەرقاڵی گەڕان و رزگارکردنی ئەو کەسانەن کە کەوتوونەتە ژێر داروپەردووی خانوو و باڵەخانەکان
