پرۆژەیەكی خزمەتگوزاری بە گوژمەی زیاتر لە 631 ملیۆن دینار له‌سنووری شاری هەولێر دەستیپێكرد
وەزارەتی شارەوانی و گەشتوگوزاری حکومەتی هەرێمی کوردستان ڕایدەگەیێنێت: لە چوارچێوەی پرۆژە خزمەتگوزارییەكانی وەزارەتی شارەوانی و گەشتوگوزار لە سنووری شار و شارۆچكەكان، پرۆژەیەكی گەورەی خزمەتگوزاری كە چەند بڕگەیەك لەخۆدەگرێت، لە گەڕەكی گوڵان لە قەزای دەشتی هەولێر لە بنەسڵاوە دەستیپێكرد.
وەزارەتەکە ڕاشیگەیاندووە:” گوژمەی پڕۆژەكە 631 ملیۆن و 29 هەزار دینارە و لەسەر بودجەی پەرەپێدانی پارێزگەی هەولێر و بە سەرپەرشتیی سەرۆكایەتیی شارەوانیی بنەسڵاوە جێبەجێ دەكرێت، كە ماوەی 300 ڕۆژ بۆ تەواوكردنی دیاریكراوە.
باسی لەوەشکردووە کە بڕگەكانی پڕۆژەكە بریتین لە دروستكردنی شەقام و ئاوەڕۆی لوولەیی، لەگەڵ دانانی قاڵبی كیربستۆن بە درێژایی7600م و فەرشكردنی تێكەڵە و فەرشكردنی بەردی شكاو و دروستكردنی ئاوەڕۆی لوولەیی و چەند تایبەتمەندییەكی دیكەش.
ئەو پڕۆژەیە كاریگەرییەكی زۆر باشی لەسەر پەرەپێدانی پرۆژە خزمەتگوزارییەكانی بنەسڵاوە دەبێت، هاوكات هەر ئێستا ژمارەیەك پرۆژەی دیكەش لە بنەسڵاوە لەلایەن شارەوانییەوە لە بواری جێبەجێكردندان.
