حکومەت : پڕۆژەی (هەژماری من) هەلی کاری زیاتر دەڕەخسێنێ و مووچەش لەکاتی خۆیدا دەدرێ

حکومەتی هەرێمی کوردستان رایدەگەیێنێت: بەهۆی دەستپێشخەریی (هەژماری_من)ــەوە فەرمانبەرانی کەرتی گشتی، خانەنشینان و هێزە ئەمنییەکان بەشێوەیەکی پارێزراو، شەفاف و گونجاو لەڕێگەی تۆڕێک لە ئامێری راکێشانی پارەوە (ATM)، کە زیاتر لە هەزار بنکە لە تەواوی هەرێمی کوردستان دادەنرێن، دەتوانن دەستیان بە مووچەکانیان بگات.

فەرمانگەی میدیا و زانیاری حکومەتی هەرێمی کوردستان رایگەیاند:” شێوازی پێدانی مووچە گۆڕانکاریی بەسەردا دێت، خزمەتگوزاریی پارەدانی دیجیتاڵی و هەژماری من، هەنگاوێکی نوێی کابینەی نۆیەمی حکومەتی هەرێمی کوردستانە بۆ بەئەلیکترۆنیکردنی کاروبارەکانی حکومەت.

راشیگەیاندووە:” دەستپێشخەری هەژماری من، کە لەلایەن مەسرور بارزانی، سەرۆکوەزیرانی هەرێمی کوردستانەوە راگەیاندرا، کۆمەڵێک سوودی بۆ هاووڵاتییان و ئابووریی هەرێمی کوردستان دەبێت، سوودەکانی ئەمانەن:

بۆ هاوڵاتییان:

ئاسانکاری و سەلامەتی هەژمارەکان، پێدانی مووچە بەشێوەیەکی رێکوپێک و لەکاتی خۆیدا بەبێ نۆرەگرتن، کەمکردنەوەی مەترسیی دزینی مووچە و پاشەکەوت.

بۆ بەرهەمە داراییەکان:

دروستکردنی داهاتی زیادە لە دانانی پارەی نەختینەیی ناکارا لە پاشەکەوتدا، کڕینی کاڵا یان پارەدان بە خەرجییە کەسییەکان لەڕێی قەرزی ئاسانەوە، باشتربوونی ڕۆشنبیری دارایی.

بۆ پارەدانی دیجیتاڵی:

پارەدان بۆ کڕینی کاڵا و خزمەتگوزارییە ئۆنلایینەکان بە بەکارهێنانی کارتی بانکی، توانای حەواڵە لەنێوان هەژمارە جیاوازەکان لەڕێی کارتی مۆبایل/ ئینتەرنێت، وەرگرتنی حەواڵەی نێودەوڵەتی بێ ئەوەی پێویست بکات سەردانی نووسینگەی ئاڵوگۆڕی دراو بکەیت.

بۆ ئابووریی هەرێمی کوردستان:

زیادبوونی بەرهەمی ناوخۆیی، بەهۆی بەشداریکردنی هاوڵاتییان لە کەرتی بانکیدا، زیادبوونی خەرجیی بەکاربەران بەهۆی زیادبوونی قەرزی تاکەکەسی، رەخساندنی هەلی کار لە کەرتی بانکی، کەمکردنەوەی پشتبەستن بە مامەڵەی کاش، زیادکردنی کارایی حکومەت و شەفافییەت، سەرهەڵدانی پارەدانی دیجیتاڵی بۆ خزمەتگوزارییە گشتییەکان.

ئەم هەنگاوانەی کابینەی نۆیەمی حکومەتی هەرێمی کوردستان بۆ ئەوەیە کە زۆرینەی کاروبارەکانی حکومەت بکرێنە ئەلیکترۆنی و رۆتینی دامودەزگاکان کەمبکرێنەوە، ئەمەش لەپێناو کارئاسانی بۆ هاوڵاتییان.