محەمەد شیاع سوودانی لە سلێمانی بافڵ تاڵەبانی بێ هیوا کرد
سەرۆك وەزیرانی عێراق لە سلێمانی بە ناڕاستەوخۆ، پەیامێكی بە سەرانی یەكێتی دا و رایگەیاند، كێشەكان لەگەڵ حكومەتی هەرێمی كوردستان چارەسەر دەكەین.
محەمەد شیاع سوودانی لە وتارێكی كە لە سلێمانی پێشكەشی كرد و گوتی، كابینەی نوێی حكومەتی عێراق، بەشێك لە كارنامەكانی جێبەجێ كراوە و بەڵێنی چاكسازیش بە هاووڵاتییان دەدەین.
سەرۆك وەزیرانی عێراق رایگەیاند، ئێمە دووپات لەوە دەكەینەوە بەهێزیی هەرێمی كوردستان سەلمێنەری بەهێزیی عێراقە، بۆیە رێنادەین خاكی عێراق بۆ بەئامانجگرتنی وڵاتان بەكار بێت و عێراق رێز لە سەروەریی خاكەكەیان دەگرێت.
باسی لەوەشكرد كە لەگەڵ شاندی هەرێمی كوردستاندا گفتوگۆیەكی بەرهەمداریان كردووە، بۆیە لەگەڵ هەرێمی كوردستان یاسای نەوت و غاز دەردەكەین و لەگەڵ هەرێمی كوردستان كێشەكان چارەسەر دەكەین.
