ئاشکرابوو… لە نێو یەکێتی کودەتا بەڕێوەیە
لەمانگی حوزەیرانی ئەمساڵ بافڵ و قوباد تاڵه‌بانی، دەیانەوێ پێش هەڵبژاردنی پەرلەمانی كوردستان، كۆنگرەیه‌ك به ناوی یه‌كێتییەوە بكەن، سەرچاوەیەکی ئاگاداریش لە ئەنجومەنی سەركردایەتیی یەكێتیی هۆشداری دەدات و دەڵێ: ئەگەر بافڵ و قوباد تاڵەبانی كۆنگرەیەكی وا بكەن، دۆخێكی زۆر ئاڵۆز دروست دەبێت، ئەوكات لاهور جەنگی و گرووپی دیكەش لەنێو یەكێتی، مافی ئەوەیان دەبێت كۆنگرەی خۆیان ببەستن.
سەرچاوەیەکی ئاگادار لە ئەنجومەنی سەركردایەتیی یەكێتیی ئاشکرای کرد، بافڵ و قوباد تاڵه‌بانی، دەیانەوێ لە مانگی حوزەیرانی ئه‌مساڵ و پێش هەڵبژاردنی پەرلەمانی كوردستان، كۆنگرەیه‌ك به ناوی یه‌كێتییەوە بكەن و تێیدا لە 123 ئەندامی ئێستای ئەنجومەنی سەركردایەتیی یەكێتی، 40 بۆ 45 كەسیان بهێڵنەوە
ئەوەشی باس کرد کە دەیانەوێت لە کۆنگرەکە ئەنجومەنی باڵای سیاسی و بەرژەوەندییەكانی یەكێتیش لەو كۆنگرەیەدا هەڵبوەشێننەوە.
ئەو سەرچاوەیە ئەوەشی دركاند كە بەشێك لە ئامانجەكانی كۆنگرەكە، بۆ ئەوەیە لە كێشەی هاوسەرۆكی ڕزگاریان ببێت، چونكە هێشتا زۆرینەی هەرەزۆری یەكێتییەكان، لاهور جەنگی بە هاوسەرۆكی حزبەكەیان دەزانن.
گوتیشی: ”ئەگەر بافڵ و قوباد تاڵەبانی كۆنگرەیەكی وا بكەن، دۆخێكی زۆر ئاڵۆز دروست دەبێت، چونكە ئەوكات لاهور جەنگی و گرووپی دیكەش لەنێو یەكێتی، مافی ئەوەیان دەبێت كۆنگرەی خۆیان ببەستن.“
