بە سەرپەرشتیی مەسرور بارزانی ئەنجومەنی وەزیران کۆبوونەوەی ئاسایی خۆی دەکات
ئەمڕۆ چوارشەممە، رێکەوتی 12ی نیسانی 2023، ئەنجومەنی وەزیرانی هەرێمی کوردستان بە سەرپەرشتیی مەسرور بارزانی، سەرۆکی ئەنجومەنی وەزیرانی هەرێمی کوردستان کۆ دەبێتەوە و تێیدا چەند تەوەرەیەک دەخرێنە ڕوو، لە بڕگەی یەکەمیدا بابەتی پاراستنی هاووڵاتییان و دامودەزگا خزمەتگوزارییە حکومییەکان لە رێگەی بەدوورگرتنی هەرێمی کوردستان لە راکێشانی کێشە ناوچەیی و دەرەکییەکان بۆ ناو هەرێمی کوردستان دەخرێتە ڕوو.
ئەوەش خراوەتە ڕوو، بڕگەی دووەمی کۆبوونەوەکە تایبەت دەبێت بە خستنەڕووی بابەتی دابینکردنی دەرمان و پێداویستییە پزیشکییەکان، بە مەبەستی دیاریکردنی کێشە و چارەسەرەکان.
باس لەوەش كراوە، بابەتی سیاسەتی پاراستنی منداڵان لە هەرێمی کوردستان، لە بڕگەی سێیەمی کۆبوونەوەکەدا دەخرێتەڕوو.
