ئەندامێكی سەركردایەتی پارتی :دەستخۆشی لە دكتۆر نەجمەدین دەكەم
خواكوڕك
پاش ئەوەی پارێزگای كەركوك دكتۆر نەجمەدین كریم بڕیاری هەڵكردنی ئاڵای كوردستانی لەسەرجەم دام و دەگاكانی نێوشاری كەركوكدا ، سەرباری ناڕەزایەتی هەندێك كەس و لایەنی سیاسی ، بەڵام پارتی دیموكراتی كوردستان پاڵپشت و پشتیوانی لەو هەنگاوە دەربڕی .
ئەندامێكی سەركردایەتی پارتی دیموكراتی كوردستان لە هەژماری تایبەتی خۆی لە تۆڕی كۆمەڵایەتی فەیسبوك دەستخۆشی لە پارێزگای كەركوك دەكات و دەڵێت ” ئەوە بڕیارێكی دروست و لە جێی خۆیدایە “.
“عەلی عەونی ” ئەندامی سەركردایەتی پارتی دیموكراتی كوردستان لە پۆستێكدا لە تۆڕی كۆمەڵایەتی فیسبووك دەنوسێت و دەڵێت ” دەستخۆشی لە دكتۆر نەجمەدین دەكەم و كارێكی دروست و لە جێی خۆیدایە ، نوێنەری نەتەوە یەكگرتووەكان كە ناڕەزایی لە بەرامبەر ئەو هەنگاوەی پارێزگای كەركوك دەربڕیوە ، باشترە بچن خەمی بڕینی بودجەی كوردستان و نەدانی مافی پێشمەرگە و جێبەجێ نەكردنی دەستورو بڕینی بەشە دەرمانی كوردستان و بە خێو كردنی ئاوارەكانی شەڕی داعش لە لایەن حكومەتی بەناو عێراق بخوات “.
شایەنی گوتنە پرسی هەڵكردنی ئاڵای كوردستان لە كەركوك دەنگۆیەكی زۆری بەدوای خۆیدا هێنا لە هەرێمی كوردستان بە هەنگاوێكی باش و ئەرێنی وەسف كرا ئەمە لە كاتێكدا فراكسیۆنی یەكێتی لە بەغدا رایگەیاند بوو كە دوای تەواو بوونی جەژنی نەورۆز ئەو ئاڵایەدەهێننە خوارەوە.
