بڕیاری کاراکردنەوەی کۆمسیۆنی هەڵبژاردن و راپرسی لە وەقایعی کوردستان بڵاوکرایەوە

رۆژنامەی وەقایعی کوردستان، دەقی بڕیاری پەرلەمانی کوردستانی بۆ کاراکردنەوەی کۆمسیۆنی باڵای سەربەخۆی هەڵبژاردنەکان و راپرسی لە هەرێمی کوردستان بڵاوکردەوە

وەزارەتی دادی هەرێمی کوردستان رایگەیاند: ژمارە «305»ـی ڕۆژنامەی وەقایعی کوردستان بڵاو کرایەوە، کە رۆژنامەی فەرمی هەرێمی کوردستانە و وەزارەتی داد دەریدەکات، لەو ژمارەیەدا بڕیاری ژمارە (10)ـی ساڵی 2023 پەرلەمانی كوردستان بڵاو كراوەتەوە تایبەت بە بەردەوامبوون و ھەڵبژاردنی ئەندامانی ئەنجومەنی كۆمسیاران لە كۆمسیۆنی باڵای سەربەخۆی ھەڵبژاردن و راپرسی، هەروەها لەگەڵ ژمارەیەک رێنمایی و بەیان.

رۆژنامەی وەقایعی کوردستان لە بڕیاری ژمارە (10)ـی ساڵی 2023 رایگەیاند: پاڵپشت بە حوکمی بڕگەی 1 لە ماددەی 56 لە یاسای ژمارە 1ـی ساڵی 1992ـی هەموارکراو و حوکمی مادەی خاڵی 1ـی بڕگەی یەکەم لە ماددەی 5ـی یاسای کۆمسیۆنی باڵای سەربەخۆی هەڵبژاردن و راپرسی لە هەرێمی کوردستان – عێراق ژمارە 4ـی ساڵی 2014 بڕیارمان دا بە:-

یەکەم: بەردەوامبوونی هەریەک لەم بەڕێزانەی خوارەوە وەک ئەندامی ئەنجومەنی کۆمسیاران لە کۆمسیۆنی باڵای سەربەخۆی هەڵبژاردن و ڕاپرسی بۆ ماوەی پێنج ساڵ کە دەستپێدەکات لە رۆژی کۆتاهاتنی ماوەی یەکەمی کارکردنی ئەنجوومەنی کۆمسیاران لە رێکەوتی 23ـی 12ـی2019:

1- هەندرێن محەمەد ساڵح

2- نەهرۆ سەلیم حەنا

3- رێزان حەمەڕەشید کەریم

4- عەبدولسەمەد خزر عەبدوڵا

5- شێروان زرار نەبی

6- ئیسماعیل حەمەعەلی عەبدولقادر

7- سلێمان مستەفا حەسەن

دووەم: هەڵبژاردنی هەریەک لەم بەڕێزانەی خوارەوە بە ئەندامی ئەنجومەنی کۆمسیاران لە کۆمسیۆنی باڵای سەربەخۆی هەڵبژاردن و ڕاپرسی، لە رۆژی دەرچوونی ئەم بڕیارە:

1- عەلی ساڵح مەحموود قادر

2- کامەران نەشئەت بەکر ئەحمەد

سێیەم: ئەم بڕیارە لە ڕۆژی دەرچوونییەوە کاری پێدەکرێت و لە رۆژنامەی فەرمیی وەقایعی کورستان بڵاو دەکرێتەوە.