حکومەتی هەرێم بڕیاری خەرج کردنی نزیکەی پێنج ملیار دیناری بۆ سلێمانی دا
حکومەتی هەرێمی کوردستان بڕیاریدا، زیاتر لە چوار ملیار و 644 ملیۆن دینار بۆ پرۆژەكانی شاری سلێمانی خەرج بكرێت
راگەیاندنی وەزارەتی شارەوانی و گەشتوگوزاری حکومەتی هەرێمی کوردستان رایگەیاند:” بە گوێرەی فەرمانێكی وەزارەتی شارەوانی و گەشتوگوزار بە واژووی ساسان عەونی، وەزیری شارەوانی و گەشتوگوزار، رەزامەندی درا لەسەر خەرجكردنی گوژمەی زیاتر لە چوار ملیار و 644 ملیۆن دینار بۆ پرۆژە خزمەتگوزارییەكانی شاری سلێمانی.
راشیگەیاندووە:” گوژمەكە بریتییە لە (4،644،637،500) چوار ملیار و شەش سەد و چل و چوار ملیۆن و شەش سەد و سی و حەوت هەزار و پێنجسەد دینار و لەسەر رێژەی 100%ی داهاتی فرۆشتنی زەویی شارەوانی لە سنووری سەرۆكایەتیی شارەوانیی سلێمانی بۆ جێبەجێكردنی 14 پرۆژەی جۆراوجۆری خزمەتگوزاری لە شاری سلێمانی.
پرۆژەكان پێكهاتوون لە بواری كردنەوەی شەقام و كۆنكرێتكردن و دروستكردن و درێژكردنەوەی تۆڕی ئاوەڕۆ و گەیاندنی خزمەتگوزاری و قیرتاوكردنی شەقامەكان و دابینكردنی قیری شل و سووتەمەنی بۆ گارگەی قیری تانجەڕۆ، لەگەڵ چەند بوارێكی تری خزمەتگوزاری لە شاری سلێمانی.
