رێبەر ئەحمەد: ئەمریکا ئەزموونی هەرێمی کوردستان لە بابەتی دیموکراسی و ئازادی رادەربڕین بەرز دەنرخێنێت
![](https://xwakurk.com/wp-content/uploads/2023/06/٢٠٢٣٠٦١٣_١٠٥٨٣٧.jpg)
وەزیری ناوخۆی هەرێمی کوردستان رایدەگەیەنێت، کۆبوونەوەکانی چەند رۆژی رابردوویان لەگەڵ بەرپرسانی ئەمریکا دەرئەنجامی باشیان هەبووە و، وەکو خۆی دەڵێت، واشنتن پشتگیریی خۆی بۆ قەوارەی هەرێمی کوردستانی دووپاتکردووەتەوە .
رێبەر ئەحمەد، وەزیری ناوخۆی هەرێمی کوردستان بە ئاماژەدان بەوەی، ئەمریکا پشتگیری خۆی بۆ قەوارەی هەرێمی کوردستان لە چوارچێوەی عێراقێکی بەهێزدا دووپاتکردووەتەوە، گوتیشی، لە کۆبوونەوەکاندا ئەزموونی هەرێمی کوردستان لە پرسی دیموکراسی و ئازادی رادەربڕین بەرز نرخێندرا.
هەر لە بارەی کۆبوونەوەکان گوتیشی، باس لە ئارامی و سەقامگیری عێراق و هەرێمی کوردستان کراوە و، وەکو خۆی دەڵێت، “لە کۆبوونەوەکاندا پاراستنی هەرێمی کوردستان یەکێک لە سەرەکیترین بابەتەکان بوو و وەکو دۆستێکی نزیکی هێزەکانی هاوپەیمانان کە رووبەڕووی تیرۆرستانی داعش بوونەتەوە تەماشە دەکرا. هاوکات رۆڵی پێشمەرگە و هەرێمی کوردستان لەو چوارچێوەیەدا بەرز نرخێندرا”.
رێبەر ئەحمەد گوتی، “هەردوولامان هاوڕابووین لەسەر ئەوەی پێویستە دەستوور رێزی لێ بگیرێت و توانا داراییەکانی عێراق لەگەڵ کورد، سووننە، شیعە، کریستیان، تورکمان و هەموو پێکهاتەکانی دیکەی وڵاتەکە هاوبەش بکرێت. دەبێت هەمووان سوود لە بودجەی عێراق وەربگرن و بەشی راستەقینەی خۆیان لە خزمەتگوزارییەکان وەربگرن، ناکرێت تەنها سەرج بدرێتە سەر ناوچە و پێکهاتەیەک، بەڵکوو دەبێت هەموومان وەکو عێراقی سوودی لێ وەربگرین”.
گوتیشی، “ئەمریکا خۆشحاڵی خۆی بە پڕۆسەی چاکسازی لەنێو هێزەکانی پێشمەرگە دەربڕی و پابەندی خۆی نیشاندا بۆ ئەوەی هاوکابن لەگەڵ هێزەکانی پێشمەرگە بۆ ئەوەی ببێتە هێزێکی توکمە و رێکخراو و رووبەڕووی هەموو هێرشەکان ببێتەوە کە رووبەڕووی دەبێتەوە”.
وەزیری ناوخۆی هەرێمی کوردستان روونیکردەوە، “ئەمریکا پێی خۆشە کوردستان هەرێمێکی سەقامگیر و بەهێز بێت و دووپاتیان کردەوە، بەردەوام دەبن لە کارکردن لەگەڵ هێزەکانی پێشمەرگە.”