ئاسایشی هەولێر دەستی بەسەر کۆگایەکی بێ مۆڵەتی (چەک و کردنەوەی چەک)دا گرت

بەڕێوەبەرایەتی ئاسایشی هەولێر رایدەگەیێنێت: لە هەولێر دەستیان بەسەر کۆگایەکی بێ مۆڵەتی (چەک و کردنەوەی چەک)دا گرت

بەڕێوەبەرایەتیی ئاسایشی هەولێر لە راگەیاندراوێکدا رایگەیاندووە : “دوای کۆکردنەوەی زانیاری و ئەنجامدانی بەدواداچوون لە لایەن هێزەکانمان لە بەڕێوەبەرایەتیی ئاسایشی هەولێر و بە هەماهەنگی لەگەڵ بەشی (هەواڵگریی فەرماندەی زێرەڤانی)، دوای وەرگرتنی رەزامەندیی دادوەری لێکۆڵینەوەی ئاسایشی هەولێر، لە گەڕەكی (لاوان) لەناو شاری هەولێر، توانیمان دەست بەسەر کۆگایەکی بێ مۆڵەتی (چەک و کردنەوەی چەک)دا بگرین.”

راشیگەیاندووە: “لە کاتی پشکنین بۆ ئەم کۆگایە، دەست بەسەر دەیان پارچە چەکی جۆراوجۆردا گیرا كە چەكەكان لە جۆری (کلاشینکۆف، دەمانچە، M4، قەناس و بی كەی سی) بوون، لەگەڵ ژمارەیەکی زۆری (فیشەک) و سەدان پارچەی يەدەگی چەک و چەند ئامێرێکی تایبەتیی تۆڕنەکردن و لێدان و گۆڕینی ژمارەی چەک و چەندین پارچەی جۆراوجۆری کەلوپەلی سەربازی، کە بە شێوەی نایاسایی مامەڵەی پێوە دەکرا.”

ئاماژە بەوەش کراوە: “هاوكات خاوەنی كۆگاكە بە ناوی (ر، ع، ج) دەستگیر کرا و پەراوی لێکۆڵینەوەی بۆ کراوەتەوە و رووبەڕووی یاسا دەکرێتەوە.”