فەرەنسا گەورەترین پرۆژەی وەبەرھێنان لەسـەر ئاستی رۆژھەڵاتی ناوەڕاست لەکەرتی کشتوکاڵیدا لە کوردستان ئەنجامدەدات
![](https://xwakurk.com/wp-content/uploads/2023/08/٢٠٢٣٠٨١٠_١٩٤٢٣١.jpg)
بڕیارە فەرەنسا گەورەترین پرۆژەی وەبەرھێنان لەسـەر ئاستی رۆژھەڵاتی ناوەڕاست لەکەرتی کشتوکاڵیدا لە کوردستان ئەنجامبدات.
دەستەی وەبەرهێنانی حکومەتی هەرێمی کوردستان رایگەیاند:” د.محەمەد شوکری سەرۆکی دەستەی وەبەرھێنان لەگەڵ رودولف ریشارد جێگری کونسـوڵی گشتی فەرەنسا لە ھەولێر و شاندێکی یاوەری کۆبویەوە و کە ھەریەک لە بەرپرسی بەشی ئابووری کونسوڵخانە و بەڕێوەبەری کۆمپانیای سیرسیزی فەرەنسی ئامادەی بوون تێدا، باس لە ئەنجامدانی گەورەترین پڕۆژەی وەبەرهێنانی کشتوکاڵی تایبەت بە چاندنی دارو درەخت و هەروەها کردنەوەی نەمامگەیەکی مۆدێرن و سەردەمیانە لە سنووری پارێزگای هەولێر کرا.
ئەوەش خراوەتە روو کە،” پرۆژەکە لەسەر رووبەری ٢٥ دۆنم زەوی و لەقۆناغی یەکەمدا ٥٠٠ جۆر لە دارودرەخت کە ٦٠٠ ھەزار شتڵ و دارودرەخت لەخۆ دەگرێت دەچێندرێت، بەمەش دەبێتە مەزنترین پڕۆژەی کشتوکاڵی کە هەزاران دەرفەتی کار بۆ جووتیاران و هاووڵاتییانی هەرێمی کوردستان دەڕەخسێنێت .
پالمێر ( Palmer project ) ناوی پڕۆژەکەیە و لەهەریەک لە وڵاتانی مۆریتانیا و سەنیگال و مەغریب و ساحل عاج ئەنجامدراوە .
دەستەکە باسی لەوەشکردووە:” لەچەند رۆژی داهاتوو دەست بە رێکارەکانی ئەنجامدانی پڕۆژەکە دەکرێت و بە تەواوبوونی دەبێتە گەورەترین پڕۆژە لەسەر ئاستی هەرێمی کوردستان و عێراو و وڵاتانی رۆژهەڵاتی ناوەڕاست .