سەركردەیەكی گۆڕان: یه‌كێتی پاساو بۆ شه‌هیدكردنی رۆڵه‌ی كورد لە كه‌ركووك ده‌هێنێته‌وه
كه‌ریم فه‌خری، ئه‌ندامی جڤاتی گشتیی گۆڕان رایگەیاند: به‌داخه‌وه بۆ هه‌ڵوێستی دوێنێی یه‌كێتی، تا كاتژمێره‌كانی دره‌نگی شه‌و كه‌ناڵی راگه‌یاندنی یه‌كێتی خواخوایان بوو خۆپیشاندانی گەنجانی كەركووك دابمركێته‌وه و نه‌بێته رووداوێكی گه‌وره، چونكه نه‌یان ده‌توانی هه‌ڵوێستیان هه‌بێت، كه زانییان خۆپیشاندان گه‌وره بوو و شه‌هیدی لێ كەوتەوە، كه‌وتنه پاساوهێنانه‌وه بۆ داگیركه‌ران و وه‌ك كۆیله و به‌كرێگیراو هاتن خۆپیشاندانی خەڵكی كەركووكیان به گێره‌شێوێنی وه‌سف كرد.
روونیشی كردەوە: یه‌كێتی له 16ـی ئۆكتۆبه‌ر، به پاساوی به‌رگرینه‌كردن له بیره نه‌وت و ئێستا به پاساوی ئه‌وه‌ی رۆڵەی كورد خوێنی نه‌ڕژێت، ئاماده‌یه وه‌ك كۆیله و به سه‌رشۆڕی له‌بە‌رده‌م ئه‌و داگیركارییه‌دا بژیت.
سەركردەكەی گۆڕان جەختی كردەوە: یه‌كێتی له‌مێژه بڕیاری داوه له‌و شاره سه‌رشۆڕانه چۆك بۆ راكان و گرووپه میلیشیاكان دابدات، ئێستاش ده‌زانێت خه‌ڵك لێیان تووڕه‌یه، ده‌ڵێن با خوێن نەڕژێت، باشە خێرە تەنیا ئەو كاتە خوێن دەڕژێت كە كورد داوای مافی خۆی دەكات؟ ئه‌سڵه‌ن ئێوه كه‌س حیسابتان بۆ ناكات، تا قسه له‌سه‌ر كه‌ركووك بكه‌ن.
