سەرۆك بارزانی پێشوازی لە باڵیۆزی ئەمریكا لە عێراق دەكات

رۆژی دووشەممە 11ی ئەیلوولی 2023 لە سەلاحەددین سەرۆك مەسعود بارزانی پێشوازی لە خاتوو ئەلینا رۆمەنۆوسكی باڵیۆزی ئەمەریكا لە عێراق و شاندێكی یاوەری كرد.

لە دیدارەكەدا بیروڕا لەبارەی بارودۆخی سیاسی ناوچەكە و عێراق و ئاستەنگ و گرفتەكانی بەردەم پەیوەندییەكانی نێوان هەرێمی كوردستان و عێراقی فیدڕاڵ و پشتبەستن بە دیالۆگ لەپێناو چارەسەركردنی كێشەكان ئاڵوگۆڕ كرا.

هەر لەو دیدارەدا باڵیۆزی ئەمەریكا لە عێراق پشتیوانی وڵاتەكەی بۆ حكومەتی فیدڕاڵی عێراق و حكومەتی هەرێمی كوردستان راگەیاند بە مەبەستی بەردەوامبوونیان لە گفتوگۆ و دانوساندن و گەیشتن بە چارەسەری گونجاو بە تایبەت لە بابەتی بودجە و كێشە هەڵپەسێردراوەكانی تر. هەروەها باڵیۆزی ئەمەریكا دڵگرانی خۆی لەمەڕ گرژی و رووداوەكانی كەركووك و قوربانیبوونی هاووڵاتیان دەربڕی. هەر پەیوەست بەم باسەوە سەرۆك بارزانی پشتیوانی خۆی بە بەڕێز سودانی دووپاتكردەوە و راشیگەیاند كە گفتوگۆكان بۆ گەیشتن بە چارەسەركردنی كێشەكان بەردەوام دەبێت و هەروەها جەختیشی لەوە كردەوە كە چاوەڕوانی ئەوەن كە هەنگاوی پێویست بنرێت بۆ راستكردنەوەی بارودۆخ و پاراستنی سەقامگیری كەركووك و گرتنەبەری رێكاری یاسایی لەبەرانبەر ئەو كەسانە كە بوونە هۆی نانەوەی ئاڵۆزی و رشتنی خوێنی هاووڵاتیانی كەركووك.

بارودۆخی سیاسی ناوخۆی هەرێم و پەیوەندییەكانی نێوان پارتی و یەكێتی و پێویستی هاودەنگی ناوخۆیی هەرێم و چارەسەربوونی كێشەكان تەوەرێكی تری ئەو كۆبوونەوەیە بوو و سەرۆك بارزانی جەختی لەوە كردەوە كە درێغی ناكات لە پشتیوانیكردنی بۆ چارەسەربوونی گرفتە ناوخۆییەكانی هەرێم و بە پێویستی زانی رێگەی دیالۆگ و میانڕەوی بۆ چارەسەری گرفتەكانی نێوان هەردوولا بگیرێتە بەر.