محەمەد سەعدەدین: بەغدا دەیەوێت کوردستان لاواز و بێ هێز و بێ دەسەڵات بکات
هیچ كات بەغدا دڵسۆزی خەڵكی كوردستان نەبووە و ئەوەی حكومەتی هەرێم دەیكات، هەرگیز بەغدا نایكات، بابەتەكە ئەوەیە كە بەغدا نایەوێ خزمەتی خەڵكێك بكات كە خاوەن حكومەتی خۆیانن.
لەم بارەوە محەمەد سەعدەدین، ئەندامی خولی پێنجەمی پەرلەمانی كوردستان رایگەیاند، ئەوەی حكومەتی هەرێم بۆ كوردستانی دەكات، زۆر باشترە و جێی شانازیترە بۆ كورد لەوەی عێراق بیكات، چونكە عێراق كار بۆ ئەوە دەكات هەموو هەرێم لە چوارچێوەی مووچە بچووك بكاتەوە و وا بكات كورد تەنیا لە خەمی مووچەدا بێت و خەمی هیچ شتێكی تری نەبێت.
هەروەها گوتیشی ئەوانەی بەدوای عێراقەوەن، دەیانەوێ بەغدا بەو جۆرە مامەڵە لەگەڵ خەڵك بكات، هەر ئەوان وایان كرد حكومەت خاوەن داهات و دەسەڵات نەبێت، و ئەوانەی كوردستانیان بەمە گەیاند، با سەیرێكی دواوە بكەن تا بزانن و ببینن كوردستان پێش ساڵێك چۆن بوو و ئەم چوار مانگەش چۆنە كە مووچەی لای بەغدایە.
ئاشکراشی کرد، لە ماوەی رابردوو هەرێمی کوردستان كاری زۆر گەورەی كردووە كە لە ئاست هەرێمێك زیاتر بوون، بەتایبەت لەسەر ئاستی دەرەوە، كە هەمیشە وەك وڵاتێك دەركەوتووە و پەیوەندی لەگەڵ وڵاتە زلهێزەكان بەستووە، ئابووری بەهێز بووە و گەشەكردنی فراوانبوونی بەخۆیەوە بینیوە، هەرێمی كوردستان خاوەن قەوارەی دەستوورییە و هەرێمێكی یاساییە، لەو چوارچێوەیەشدا توانی كاری خۆی بكات و توانیویەتی پەرە بە پەیوەندییەكانی خۆی بدات.
