مەسرور بارزانی پرسەنامەیەکی بڵاو کردەوە
سەرۆکی حکومەتی هەرێمی کوردستان پرسەنامەیەکی بۆ کۆچی دوایی، حەلیمە تەقیپوور، لێکۆڵەر و مێژوونووسی کوردی خوراسان، بڵاوکردەوە و هاوخەمی خۆی بۆ بنەماڵە وئازیزانی دەردەبڕێت و بەتایبەتی بۆ هاوژینی کۆچکردوو، نووسەر و لێکۆڵەری ناسراوی کورد مامۆستا کەلیموڵڵا تەوەحوودی.
دەقی پرسەنامەکەی سەرۆکی حکومەتی هەرێمی کوردستان
بەداخەوە، هەواڵی کۆچی دوایی خاتوو حەلیمە تەقیپوور، لێکۆڵەر و مێژوونووسی کوردی خوراسان-م بیست. پرسە و سەرەخۆشی لە بنەماڵە و ئازیزانی، بەتایبەتی هاوژینە بەڕێزەکەی، نووسەر و لێکۆڵەری ناسراوی کورد مامۆستا کەلیموڵڵا تەوەحوودی دەکەم و هاوبەشی خەمیانم .
خوالێخۆشبوو خاتوو حەلیمە تەقیپوور و مامۆستا کەلیموڵڵا، خزمەتێکی زۆریان بە کولتووری کوردی و بە تایبەتی پەرەپێدان و زیندووڕاگرتنی مێژوو و فەرهەنگی کوردی خوراسان کردووە. خوای مەزن گیانی خوالێخۆشبوو بە بەهەشت شاد بکات و سەبر و ئارامییش بە هەمووان ببەخشێت.
مەسرور بارزانی
سەرۆکی حکومەتی هەرێمی کوردستان
