دەرئەنجامێن سەرەدانا سەرۆک بارزانی بۆ پارێزگەها دهوکێ
دەرئەنجامێن سەرەدانا سەرۆک بارزانی بۆ پارێزگەها دهوکێ
د ناڤەراستا هەیڤا تەباخێ دا جەنابێ سەرۆک بارزانی د سەرەدانەکا شەش رۆژی دا بو پارێزگەها دهوکێ و ئیدارا سەربەخۆیا زاخۆ چەندین دیدار و کۆمبوون دگەل هەمی تەخ و چینێن جودا دا هەبوون، جەنابێ سەرۆکی گرنگی ب چار تەوەرێن سەرەکی دا ژ وان؛
* پێدڤیە گەلێ کوردستانێ ژبیرنەکەت کو خودان دۆزەكا رەوایە و کێشەیا مە پرسا خاک و جوگرافیایێ یە. دایک و باب و خێزان زارۆکێن خوە ل سەر هزرا نیشتیمانپەروەری و وەلاتپارێزیێ پەروەردە بکەن و پەروەردەیەکا دروست کۆمەلگەهەکا تەندروست ئاڤادکەت.
* پلانا دوژمنێت گەلێ مە ب رێکا مادەیێن هۆشبەر و مەترسیێن وێ لسەر کۆمەلگەهێ و بێ ئیرادەکرنا تاکێ کورد و لاوازکرنا کەسایەتیا مرۆڤی یە.
* پێدڤیە ئەم پشتا خوە ب نەفتێ تنێ نەبەستین و ژێرخانا ئابۆریا هەرێمێ بهێز بکەین.
* پێدڤیە ژێدەرێن ئابۆری بەرفرەھ بکەین و پشت ب کەرتێ کشتوکالی و گەشتیاریێ گرێ بدەین.
نەرینێن جەنابێ سەرۆک مەنتقی و رێبەرانە بوون و خەما وی خەما ئایندە و پاشەروژا گەڵ و هەرێما مە بوو.
و هەروەسان دەرفەت ب جەماوەرێ دهۆکێ ژی هاتە دان پێشنیار و گازندە و داخوازیێن خوە بەحس بکەن و خەلکێ دهۆکێ چەندین داخوازی د وارێن کشتوکالی، گەشتیاری، پرۆژەیێن خزمەتگوزاری، داواکاریێن جەماوەری و زێدەتری 4000 داواکاریێن کەسی پێشکێشی جەنابێ سەرۆک بارزانی کرن.
هەمی داخوازیێن خەلکی ژ لایێ دەستەیا چاڤدێری و دویڤچوونێ و سکرتاریەتا بەڕێز جەنابێ سەرۆک بارزانی ڤە هاتنە وەرگرتن، و بجدی کار لسەر هاتە کرن و د بەردەوامین بۆ بەرسڤدانا داخوازیێن خەلکی.
هندەک ژ پرۆژەیێن خزمەتگوزاریێ کو داخوازیێن خەلکی بوون، جەنابێ سەرۆکی راستەراست بریارا جێبەجێکرنا وان دا و لسەر فەرمایشێن جەنابێ وی، بەڕێز کاک مەسرور بارزانی سەرۆکێ حکومەتا هەرێما کوردستانێ، رەزامەندی لسەر جێبەجێکرن و تەرخانکرنا پارەیێ پێویست دان. هەرچەند ل دەف خەلکێ پارێزگەھا دهۆکێ یا ڤەشارتی نینە کو کابینەیا نەهێ و بەرێز کاک مەسرور گرنگیەکا تایبەت ب پارێزگەها دهۆکێ و ئیدارا سەربخوەیا زاخۆ د هەمی بوارەکێ دا دایە، ب تایبەتی کەرتێ خزمەتگوزاری و ئاڤەدانیێ و پرۆسە یا بەردەوامە.
بەشەک ژ دەرئەنجامێن سەرەدانا جەنابێ سەرۆک بارزانی و ئەو پرۆژەیێن بڕیار لسەر هاتینە دان:
د وارێ خزمەتگوزاریێن گشتی دا:
١- مەزاختنا زێدەتری 18 ملیار دیناران بۆ 20 پرۆژەیێن خزمەتگوزاریێ ل دەڤەرداریا سێمێلێ (رێک وبان، کارەب، پەروەردە، ئاڤ و سۆلین و زێدەكرنا رووبەرێ کەسکاتیێ).
٢- دروستکرنا ئاڤاھیێ کۆلیژا پەروەردەیا بنیات ل ئامێدیێ.
٣- دروستکرنا ئاڤاھیێ دادگەھێ لـ ئامێدیێ.
بۆ ھەردو پرۆژان زێدەتری 9.000.000.000 نەھ ملیار دیناران ھاتینە تەرخانکرن.
٤- دروستکرنا ھۆلەکا رێ و رەسمان ل قەزا بەردەرەش کو زێدەتری (7.000.000.000)حەفت ملیار دیناران بۆ ھاتینە تەرخانکرن.
٥- دروستکرنا یاریگەھا سێمێلێ یا تەپا پێی کو زێدەتری (5.000.000.000)ملیار دیناران بۆ ھاتینە تەرخانکرن.
٦- دروستکرنا پرۆژەیێ تونێلا پیرس ب درێژاھیا (3000م)زێدەتری 141 ملیار دیناران هاتینە تەرخانکرن.
٧- بڕیارا دروستکرنا موزەخانا (کەلھا نزارکێ).
٨- جێبەجێکرنا پرۆژەیێ ئاڤا ئاکرێ، ب گوژمێ (109 ملیار دیناران).
د وارێ کەرتێ گەشتیاریدا :
ھەتا نوکە ئەڤ پرۆژە ھاتینە جێبەجێکرن و پرۆسە بەردەوامە؛
١- دانانا بەرێ بناغەی بۆ کۆمەلگەھەکا گەشتیاری ل سولاڤێ- ئامێدیێ (ھوتێل، مەلەڤانگەھ، مۆتێل).
٢- دانانا بەرێ بناغەی بۆ گەراجا سێ نھۆمی ل سولاڤێ- ئامێدیێ.
٣- نووژەنکرن و دروستکرنا رێک و بان و بازگەھێن د ناڤبەرا دھۆک و پارێزگەھا مووسلدا.
٤- قەدەغەکرنا ب کرێدانا باغان (مەزرەعەیان) ب گەشتیارێن بیانی بۆ مەبەستا گرنگیدان ب ھۆتێل و مۆتێلن گەشتیاری.
٥- جێبەجێکرنا کۆڕنیشێ ل سەر رویبارێ شین.
د وارێ کەرتێ کشتوکالیدا:
١- ڤەکرنا فیستەڤالا بەرھەمێن خومالی ل ئاکرێ.
٢-بڕیارا دروستکرنا کارگەھا سماقێ ل ئاکرێ.
٣- بڕیارا ڤەکرنا فیستەڤالا تەحینێ ل ئامێدیێ.
٤- ئامادەکاری بۆ ڤەکرنا فیستەڤالا بەرھەمێن خومالی ل دەڤەرا بەرواریان.
٥- سازکرنا فیستەڤالا تری و ھنگڤینیێ لسەر ئاستێ پارێزگەھا دھوکێ.
ژبلی ئەڤان، وەرگرتنا دەینێ سلفا زەواج و خانوبەران هاتە راگرتن و هەمی جهێن دومبەلێ کو گازندەکا زۆرا خەلکی لسەر هەبوو هاتنە گرتن و هەمی هێزێن ئەمنی و لایەنێن پەیوەندیدار هاتنە ئاگەهدارکرن کو ب جدی بەرهەنگاریا مادەیێن هۆشبەر ببن و ب تایبەتی بازرگانێن وێ، رێکارێن توندێن ئەمنی و یاسایی دگەلدا بهێنە وەرگرتن، و هەر بۆ ڤێ مەبەستێ، دێ ل ڤان رۆژان کۆنفرانسەکێ زانستی لدور بەرهەنگاربوونا مادەیێن هۆشبەر ل دهۆکێ دێ هێتە سازکرن.
ب رێبەریا سەرۆك بارزانی و پارتی دیموكراتی كوردستان، كاروانێ چاكسازیێ و پاراستنا جڤاك و ھەرێما كوردستانێ ژ ھەر دوژمنكاریەكێ دێ بەردەوام بیت.
