لە هەولێر زەوی بۆ 63 پرۆژەى وەبەرهێنان و پیشەسازی دابین دەکرێ
هەولێر لە کۆی 73 پرۆژە، 63 پرۆژەى پیشەسازیى قورس و مامناوەند بە ڕووبەرى جیا جیا زەوییان بۆ تەرخان کرا.
لە ڕاگەیاندراوێکدا پارێزگای هەولێر بڵاوی کردەوە، ئەمڕۆ چوارشەممە 18ی 10ی 2023، بە سەرپەرشتیی ئومێد خۆشناو، پارێزگاری هەولێر، بە مەبەستى پەرەپێدانى زیاتر بە پرۆژەکانى وەبەرهێنان و پیشەسازی و زیادکردنى دەستى کار و ڕێژەى بەرهەمى خۆماڵى و هاندانى کەرتى تایبەت بۆ سەرمایەگوزارى لە هەولێری پایتەخت، بە ئامادەبوونى سەرجەم ئەندامانى لیژنە، کۆبوونەوەى لیژنەی گەشەپێدان و پشتگیریی پرۆژە پیشەسازییەکان به‌ڕێوه چوو.
ئاماژە بەوە دراوە، لە کۆبوونەوەکەدا دواى خستنەڕوو و پێداچوونەوە بە چارەسەر و یەکلاییکردنەوەی کێشە و گرفتی چەند پرۆژەیەک، گفتوگۆ لەبارەى پەرەپێدان و بووژاندنەوە و کار و بەرهەمى پرۆژە پیشەسازییەکان لە سنوورى پارێزگاى هەولێر کرا.
ئەوەش ڕاگەیاندراوە: “داواکاریی ئەو خاوەن پرۆژانەی کە مۆڵەتى کاریان پێ دراوە و داوای تەرخانکردنى زەوییان کردووە بۆ دروستکرنی کارگەکانیان خرایە ڕوو، دواى هەڵسەنگاندن بۆ پرۆژەکان و کار و بەرهەم و ئامانج و مەبەستیان، لە کۆی 73 پرۆژە، 63 پرۆژەى پیشەسازیى قورس و مامناوەند بە ڕووبەرى جیا جیا زەوییان بۆ تەرخان کرا و سێ پرۆژە هەڵوەشێنرایەوە و (پرۆژەیەکیش ڕەزامەندى لەسەر نەدرا و شەش پرۆژەى دیکەش دوا خران بۆ دیراسەتکردنى زیاتر و سێ پرۆژەى وەبەرهێنانیش دواى ڕەزامەندى تەرخانکردنى زەوى بۆیان گەڕێندرایەوە بۆ ڕیزى پرۆژە پیشەسازییەکان.”
جێگەى باسە، لیژنەی گەشەپێدان و پشتگیریکردنی پرۆژە پیشەسازییەکان بە سەرۆکایەتیى پارێزگارى هەولێر، بەمەبەستى پەرەپێدان بە پرۆژە پیشەسازییەکان و زیادکردنى دەستى کار و ڕێژەى بەرهەمى خۆماڵى و هاندانى کەرتى تایبەت بۆ سەرمایە گوزارى لە هەولێرى پایتەخت لە ماوەى ساڵانى ڕابردوو بە ڕووبەرى فراوان زەوی بۆ چەندین کارگەی پیشەسازیی قورس و مامناوەند تەرخان کردووە، کە لە داهاتوویەکى نزیکدا بە دروستکردن و کەوتنەکارى ئەو کارگانە سوودی زۆریان دەبێت بۆ پێشخستنی کەرتی وەبەرهێنان و پیشەسازی و زیادکردنى دەرفەتى کار بۆ لاوان و گەنجانى هەولێرى پایتەخت.
