د.ڤیان سه‌بری: زۆر لە كارنامەی حكومەتی محەمەد شیاع سوودانی تایبەت بە كوردستان، جێبەجێ نەكراون
ساڵێك به‌سه‌ر پێكهێنانی كابینه‌ی حكومەتەكەی محەمەد شیاع سوودانیدا تێدەپه‌ڕێت له‌مبارەیە‌وه، ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عێراق، رایگەیاند: ”هێشتا زۆر دۆسییه هه‌یه له عێراق كاریان له‌سه‌ر نه‌كراوه، له‌وانه پرسی رووبه‌ڕووبوونه‌وه‌ی گه‌نده‌ڵی، ئێستا له عێراق گه‌ندەڵی رێكخراوی ئاشكرا بووە. جیا له‌وه‌ش، حكومه‌ت تا ئێستا به‌های دۆلار به‌رامبه‌ر به دیناری كۆنترۆڵ نه‌كردووه، ئه‌مه‌ش وه‌ك هه‌ڕه‌شه ماوه‌ته‌وه، هەروەها رێژه‌ی هه‌ژاری له عێراق تا دێت زیاتر ده‌بێت.“
هەروەها گوتیشی: ”کۆمەڵێک کارنامە لە کابیەنەکەی محەمەد شیاع سوودانی جێبەجێ نەکراون، بەتایبەت ئەو پرسانەی تایبەتن بە کەرکووک هیچی جێبەجێ نەکراون، لە کابینەکەدا لایەنی یاسادانان تا ئێستا جێبەجێ نەکراوە، پرسی یاسای بودجه و یاسای نه‌وت و غاز تا ئیستا وه‌ك خۆی ماونه‌ته‌وه، بابه‌تی ئاساییكردنەوەی شنگال به هه‌مان شێوه. ئەوەی جێبەجێ کراوە تەنیا یاسای هەڵبژاردن بووە. تا ئێستا خه‌رجی راسته‌قینه له یاسای بودجه‌ی عێراق چاره‌سه‌ر نه‌كراوه، كه راسته‌وخۆ په‌یوه‌ندییان به كوردستانه‌وه هه‌یه، هەروەها لەبارەی مووچەوە پێویست بوو دوو ترلیۆن و 100 ملیار دینار بۆ هەرێمی کوردستان بنێردرابوایە، بۆ مانگەکانی 9 و 10 و 11.“
سەرۆكی فراكسیۆنی پارتی جەختی كردەوە: ”ده‌بێ له بواری سه‌ربازیدا هه‌ماهه‌نگی له ئاستی باڵادا بكرێت، به‌تایبه‌ت له‌و ناوچانه‌ی گرفتیان له‌سه‌ره، بۆ ئه‌وه‌ی جارێكی دیكه ئه‌وه‌ی چیای قه‌ره‌چوغ دووباره نه‌بێته‌وه.“
