وەزارەتی كشتوكاڵ ئاگاداری سەرجەم جووتیارانی كوردستان دەكاتەوە

وەزارەتی كشتوكاڵ ئاگاداری سەرجەم جووتیارانی كوردستان دەكاتەوە، ئێستە ئامادەكاری دەكرێت بۆ دانانی پلانی بەرهەمی كشتوكاڵی زستانە بۆ وەرزی چاندنی 2023- 2024 و پێویستە خۆیان ناونووس بکەن.

لە ئاگادارییەكدا وەزارەتی كشتوكاڵی حکومەتی هەرێمی کوردستان رایگەیاند، ئێستە ئامادەكاری دەكرێت بۆ دانانی پلانی بەرهەمی كشتوكاڵی زستانە بۆ وەرزی چاندنی 2023- 2024، پێویستە لە ماوەی 45 رۆژدا، لە ئەمڕۆ تا 15ـی 12ـی 2023، فۆرمی زانیاریی جووتیاری راستەقینە پڕ بكەنەوە كە ئاماژە دەكات بە ناوی جووتیار و رووبەری زەویی داچێنراو و بە بڕشتی پشبینیكراو، بەمەبەستی چارەسەركردنی كێشەی بەبازاڕكردن و وەرگرتنی گەنمی جووتیاران لە چوارچێوەی پلانی ساڵانەی وەرگرتن، بە هاوئاهەنگی لەگەڵ وەزارەتی كشتوكاڵ و بازرگانی عێراق و وەزارەتی بازرگانی و پیشەسازی هەرێم.

راشیگەیاندووە، سەرجەم فەرمانگەكانی وەزارەت بە هاوئاهەنگیی لقەكانی یەكێتی جووتیاران و ئەنجومەنی گوندەكان، لیژنەی مەیدانی پێك دەهێنین و سەردانی زەوییەكانی جووتیاران دەكەن و زانیارییەكان لە فۆرمێكی ئامادەكراو تۆمار دەكەن.

لە كۆتایی ئاگادارییەكەدا هاتووە، هەر جووتیارێك بەرپرسیار دەبێت لە تۆماركردنی پێدانی زانیارییەكان لە كاتی پڕكردنەوەی فۆرمەكە، چونكە ئەم زانیارییانە دەبنە بنەمای مامەڵەكردن لەگەڵ جووتیارانمان لە كاتی ناردنی لیستی ناوی جووتیارانی راستەقینەی هەرێمی كوردستان بۆ وەزارەتی بارزگانی و وەزارەتی كشتوكاڵی فیدراڵ.