بەفەرمی دوای وەرگرتنەوەی، بارەگای مەکتەبی رێکخستنی کەرکووک-گەرمیانی پارتی پێشکەشی زانکۆی کەرکووک کرا
لە رێوڕەسمێکدا ئەمڕۆ یەکشەممە، بە شێوەیەکی فەرمی باڵەخانەی مەکتەبی رێکخستنی کەرکووک-گەرمیانی پارتی دیموکراتی کوردستان لە کەرکووک دوای وەرگرتنەوەی ، دواتر هەر لەو رێوڕەسمەدا بارەگاکە پێشکەشی زانکۆی کەرکووک کرا.
د.شاخەوان عەبدوڵڵا، لە کۆنفرانسێکی رۆژنامەوانیدا رایگەیاند: “ئەمڕۆ بەفەرمی باڵەخانەی مەکتەبی رێکخستنی کەرکووک-گەرمیانی پارتیمان وەرگرتەوە و بە سوپاسەوە لەسەر فەرمانی سەرۆک بارزانی باڵەخانەکە وەکو دیارییەک پێشکەشکی زانکۆی کەرکووکمان کرد. سوپاسی محەممەد شیاع سوودانی، سەرۆکوەزیرانی عێراقیش دەکەین بۆ جێبەجێکردنی رێککەوتنە سیاسییەکەی نێوان هەولێر و بەغدا بۆ کردنەوەی سەرجەم بارەگاکانی پارتی لە کەرکووک”.
گوتیشی، “لە ماوەی چەند رۆژی داهاتوو بە شێوەیەکی فەرمی بارەگای لقی سێی پارتی لە کەرکووک و باڵەخانەی نوێی مەکتەبی رێکخستنی کەرکووک-گەرمیانی پارتی لە شارەکە دەکرێتەوە” و جەخت لەوە دەکاتەوە، “پارتی وەکو هێزە سیاسییەکانی دیکەی کەرکووک، لە کار و چالاکییە سیاسییەکانی بەردەوام دەبێت”.
ئاماژەی بەوەشکرد، “بوونی پارتی لە شاری کەرکووک، پێکەوەژیانی ئاشتییانەی نێوان پێکهاتە و نەتەوەکانی شارەکە بەهێزتر و قووڵتر دەکات و پارێزگاری لە پێکهاتەکانی شارەکە (کورد، عەرەب، تورکمان، کریستیان و پێکهاتەکانی دیکە) دەکات”.
هاوکات، د. عومران جەمال حەسەن، سەرۆکی زانکۆی کەرکووک یش رایگەیاند، “لە دڵەوە سوپاسی سەرۆک بارزانی دەکەین بۆ ئەم دەستپێشخەرییە، جوان، زانستی و ئەکادیمییەی کردوویەتی. ئەم بارەگایەی لەلایەن پارتی دیموکراتی کوردستانەوە پێشکەشمان کراوە، دەکرێتە باڵەخانەی کۆلێژی ئەندازیاری نەوت و سامانە سروشتییەکان”.
