کەشناسی هەرێم گەیشتنی شەپۆلێکی بەفر و سەرمای راگەیاند

دوای ئەوەی دوێنێ 19ی نۆڤەمبەری 2023، شەپۆلێكی بەهێزی باران تەواوی كوردستانی گرتەوە، کەمێک پێش ئێستا دەستەی كەشناسی و بوومەلەرزەزانی سەر بە وەزارەتی گواستنەوە و گەیاندن وادەی كۆتاهاتنی شەپۆلەكەی راگەیاند، ئاماژەیشی كردووە شەپۆلێكی بەفر لەناوچە شاخاویەكان بەڕێوەیە.

كەمێك پێش ئێستە دەستەی كەشناسی و بوومەلەرزەزانیی هەرێمی كوردستان بڵاویكردەوە، دوای ئەو شەپۆلە بەهێزەی بارانبارینەی کە هەرێمی کوردستانی گرتەوە، پێشبینى دەکرێ ئەمشەو نمەباران بۆ بارانى مامناوەندى بچڕ بچڕ بەردەوام بێت لە سەنتەرى شارەکان، لە ناوچە شاخاوییەکانى باکوور و باکوورى رۆژهەڵاتیش بارانى مامناوەند ببارێت.

کەشناسی هەرێم ئاماژەی بەوەکردووە، شەپۆلێکى بەفربارین لە ناوچە شاخاوییەکان و هەندێک لە شارۆچكە و شارەدێ نزیکەکانى ئەو ناوچانە وەک ئامێدى، کانى ماسى، چامانکێ، حاجی ئۆمەران و مەرزی کێلی دەگرێتەوە، هەروەها پلەکانى گەرما زیاتر دادەبەزن.

هاوکات دەستەی كەشناسی رێژەی بارینی بارانی لە ماوەی 12 کاتژمێری رابردوودا بڵاوكردووەتەوە، و تیایدا هاتووە قەزای مێرگەسوور بە 53 ملیم زۆرترین رێژەی دابارانی تۆماركردووە لە كاتێكدا، دووكان كەمترین رێژەی دابارانی بەخۆیەوە بینیوە و لە 12 سەعاتی رابردوودا تەنیا 4 ملیم باران باریوە.