ئیدریس ئیسماعیل: بابەتی پێدانی راستەوخۆی مووچە بە فەرمانبەران تەنیا موزایەدەیە
ئیدریس ئیسماعیل ئەندامی خولی پێنجه‌می په‌رله‌مانی كوردستان، وه‌ڵامی ئه‌و موزایه‌دەی یوسف کیلابی و شاسوار عەبدولواحید و غالب محەمەدی دایەوە، کە گوایه به‌غدا ئاماده‌یه راسته‌وخۆ مووچه‌ی مووچه‌خۆرانی كوردستان بنرێت و گوتی: ”ئه‌مه‌ش وه‌ك هه‌ڵمه‌ته‌كانی دیكه، دەبێتە بڵقی سه‌رئاو“.
ئەو پەرلەمانتارەی پێشوو گوتیشی: ”ئەو بانگەشانەی دەكرێن و ئەو نووسراوانەی بۆ پەرلەمانی عێراق كراون، گوایە بەغدا ئامادەیە مووچەی مووچەخۆرانی كوردستان راستەوخۆ بدات، هەمووی موزایەدەن و هیچ هەنگاوێكی كرداری لەمبارەیەوە نییە و بەپێچەوانەوە، بەغدا دان بە نیوەی مووچەخۆرانی كوردستاندا نانێت و ئامادەش نییە مووچەی مانگانەی مووچەخۆران بە تەواوی بدات، بۆیە هەر كەسێك موزایەدە بەم بابەتەوە دەكات، با بپرسێت، حكومەتێك ئامادە نەبێت مووچەی مانگانەی مووچەخۆران بنێرێت، چۆن ئامادەیە راستەوخۆ پارە بدات؟.“
ئەوەشی ئاشکراکرد كە ناردنی نووسراوێك بۆ پەرلەمانی عێراق، هەر تەنیا بۆ ورووژاندنی شەقام و هاندانی خەڵكە لە دژی هەرێمی كوردستان، ئەگینا حكومەتی عێراق ئەگەر جددی بێت لە بابەتێكی لەم شێوەیە، ئەوا نووسراوی لەم جۆرە بۆ لێژنەی دارایی پەرلەمانی عێراق نانێرێت، بەڵكو لەگەڵ حكومەتی هەرێمی كوردستان گفتوگۆی لەگەڵ دەكات، بەڵام ئەوان نەك جددی نین، بەڵكو مووچەش بكەوێتە دەستیان، وەك بودجەكەی كوردستان چۆن 10 ساڵی تەواوە دەیبەن و كەسیش نازانێ چیان لێی كردووە، ئاوا ئەویش حەپەلووش دەكەن!
ئیدریس ئیسماعیل ئەوەشی زیادکرد: ”ئەو قسانەی لەم ڕۆژانە دەكرێن لەبارەی دابەشكردنی راستەوخۆی مووچە، وه‌ك بڵقی سه‌ر ئاوه. ئه‌م گرووپانه له 2014ەوە خه‌ركی بڵاوكردنەوەی ئەم جۆرە قسانەن، ئامانجیشیان بەردەوام ئەوە بووە خەڵك له دژی كوردستان هان بدەن و هەستی جاشایەتیكردن بۆ بەغدا بەهێز بكەن، بۆیە پێویستە كەسیش گوێ بەم قسانەیان نەدات.“
