بەردی بناغەی چەندین پڕۆژەی خزمەتگوزاری لە زاخۆ دانرا

ئەمڕۆ چوارشەممە، 29ی نۆڤەمبەری 2023، لەسەر راسپاردەی مەسرور بارزانی، سەرۆکی حکومەتی هەرێمی کوردستان و لەژێر چاودێری گوهدار شێخۆ، سەرپەرشتیاری ئیدارەی سەربەخۆی زاخۆ؛ بەردی بناغە بۆ چەندین پڕۆژەی خزمەتگوزاری بە گوژمەی پێنج ملیار و 767 ملیۆن و 586 هەزار دینار لە هەردوو قەزای باتیفا و ناحیەی بەرکارێ لە سنووری زاخۆ دانرا.

پڕۆژەکان بریتین لە:

– دروستکردنی رێڕەوی ئاوەڕۆ لە سەنتەری قەزای باتیفا و ناحیەی بێگۆڤا.

– دروستکردنی شۆستەکانی شەقامی 15 مەتری، چاندنی دار و رووناککردنەوەی جووت ساید و شەقامەکان لە قەزای باتیفا.

– دروستکردنی رێگەی گوندەکانی (شێرخواسکێ، ئاڤهێ تا بارهۆلێ، گوڤکا سەری، غۆلدیا، مێسکێ) لە ناحیەی بێگۆڤا.

– دروستکردنی رێگەی سەرەکی هیزاوا – دەرکار، بە درێژایی 1350 مەتر.

سەرپەرشتیاری ئیدارەی سەربەخۆی زاخۆ لە کۆنفرانسێکی رۆژنامەوانیدا رایگەیاند، “بە سوپاسەوە، بە پشتیوانی ڕاستەوخۆی سەرۆکی حکومەتی هەرێمی کوردستان، پڕۆسەی ئاوادانکردنەوەی زاخۆ بەردەوامە و رۆژانە پڕۆژەی جۆراوجۆر ئەنجام دەدەین”.

بە گوتەی گوهدار شێخۆ، “مەسرور بارزانی، سەرۆکی حکومەتی هەرێمی کوردستان بەردەوام هاوکارە بۆ ئەوەی هەرچی پڕۆژەی پێویستە بۆ سنووری زاخۆ لە زووترین کاتدا بچنە بواری جێبەجێکردنەوە. زۆرینەی رێگاوبانەکانی زاخۆمان نۆژەنکردوونەتەوە و کارکردن لە چەند پڕۆژەیەکی دیکەش بەردەوامە”.