وەزیرێكی كوردستان بۆ جێبەجێكردنی فەرمانی مەسرور بارزانی لە بەریتانیایە

وەزیری تەندروستی حكومەتی هەرێمی كوردستان، سیستەمی تاقیگە پسپۆڕیەكانی كۆلێژی شاهانە Royal College  بەسەر كردەوە ئەوەیش دوای ئەوەی مەسروور بیارزانی سەردانی ئەو شوێنەی كرد.

ئەمڕۆ هەینی 15ـی 12ـی 2023 وەزارەتی تەندروستی بڵاوی كردووەتەوە، دوابەدوای سەردانی پێشووی مەسرور بارزانی سەرۆكی حكومەتی هەرێمی كوردستان بۆ وڵاتی بەریتانیا لەئاستی باڵای دیدار و سەردانی مەیدانی و بەسەركردنەوەی سیستەمی تەندروستی بەریتانیا و ڕاسپاردەی سەرۆكی حكوومەت بۆ دروستكردنی پێوەندی و هەماهەنگی هاوبەش لەبواری پزیشكی و توێژینەوە و ڕاهێنان و ئاڵوگۆڕی شارەزایی و سوود وەرگرتن لە سیستەمی تەندروستی بەریتانیا، وەزیری تەندروستی سەردانی ئەو وڵاتەی كرد.

باس لەوەش كراوە، لە یەكەمین دەستپێشخەری و دەستكەوتی نێودەوڵەتی و مێژووییدا، شاندی باڵای وەزارەتی تەندروستی بەسەرپەرشتی سامان بەرزنجی وەزیری تەندروستی و تیمێكی پسپۆڕ سەردانی تاقیگە سەرچاوەییە پسپۆڕیە جیاوازەكانی بواری نەخۆشیزانی كۆلێژی شاهانەی بەریتانی بۆ نەخۆشیزانی Royal College of Pathologists یان كرد.

سەردانەكە بەمەبەستی لەنزیكەوە بەسەركردنەوەی ڕێكار و پڕۆسەكانی سیستەمی تاقیگەیی و پسپۆڕی بواری نەخۆشیزانی و چۆنیەتی دانانی میكانیزمی دڵنیایی جۆری بواری تاقیگە و شێوازەكانی دابینكردن و سازدانەوەی ئامێری تاقیگەیی و ئەنجامدانی پشكنینەكان و سیستەمی چاودێری پتەو بۆ ماف و بەرژەوەندی نەخۆش و كۆنتڕۆڵكردنی دەرەنجام و دەستنیشانكردنەكانی نەخۆشیە جۆراوجۆرەكان و هەوڵدان بە دروستكردنی پردی هاوبەش و متمانەپێكراوی ڕۆیاڵ كۆلێج بۆ بواری نەخۆشیزانی بۆ پەرەپێدانی تواناكانی ژێرخان و سەرچاوەی مرۆیی و پسپۆڕی تاقیگەییە جیاوازەكان و بواری ئەكادیمی و ڕاهێنان و چەندین كاروباری هاوبەش كە دەبێتە دەستكەوتی بەرەوپێشچوون و بەرزكردنەوەی ئاستی پزیشكی و پسۆڕی بواری تاقیگەییەكانی نەخۆشیزانی و نەخۆشیەكانی خوێن و بایۆلۆجی و شانەزانی …هتد لە هەرێمی كوردستان.