حکومەتی عێراق: ئیدانەی توندی دەستدرێژییەکانی ئێران بۆ سەر شاری هەولێر دەکەین
وەزارەتی دەرەوەی عێراق لە بەیاننامەیەکدا رایگەیاند، حکومەتی عێراق ئیدانەی توندی دەستدرێژییەکانی ئێران بۆ سەر شاری هەولێر دەکات، کەشەوی رابردوو بە مووشەکی بالیستی بۆردومانی شوێنەکانی نیشتەجێبوونی هاووڵاتیانی کرد، کە بووە هۆی گیان لەدەستدانی هاووڵاتیانی مەدەنی.
ئەوەش هاتووە، لە ئەنجامی بۆردومانکردنی ماڵەکانی نیشتەجێبوون، لەوانەش ماڵی بازرگانی کورد “پێشرەو دزەیی” کە بووە هۆی شەهیدبوونی و برینداربوونی خۆی و ئەندامانی بنەماڵەکەی.
لەراگەیەندراوەکەدا ئاماژە بەوەشکراوە، حکومەتی عێراق ئەم هەڵسوکەوتە بە دەستدرێژی بۆ سەر سەروەری عێراق و ئاسایشی گەلی عێراق دەزانێت، وە سوکایەتیکردنە بە دراوسێیەتی باش و ئاسایشی ناوچەکە، هەروەها ئەوەش پشتڕاست دەکاتەوە کە هەموو ڕێکارێکی یاسایی بەرامبەر دەگرێتە بەر، لەوانەش پێشکەشکردنی سکاڵا بۆ ئەنجومەنی ئاسایش.
لەو چوارچێوەیەدا سەرۆکی حکومەت بڕیاریدا لیژنەیەک بە سەرۆکایەتی راوێژکاری ئاسایشی نیشتمانی پێکبهێنرێت بۆ لێکۆڵینەوە لە هێرشەکە و کۆکردنەوەی زانیاری بۆ پاڵپشتی هەڵوێستی حکومەت لەسەر ئاستی نێودەوڵەتی و پێدانی بەڵگە و زانیاریی دروست، ئەنجامی لێکۆڵینەوەکان رادەگەیەنرێت بۆ ئاگادارکردنەوەی عێراق و رای گشتی نێودەوڵەتی لەسەر راستییەکان و سەلماندنی درۆی بانگەشەی لایەنەکانی پشت ئەم کردەوە مەحکومانە.
