گوتەبێژی فراکسیۆنی پارتی: دادگای فیدراڵی بەمەبەست پرسی هەڵبژاردنی پەرلەمانی کوردستان دوادەخات
گوتەبێژی فراکسیۆنی پارتی لە پەرلەمانی عێراق رایدەگەیێنێت: دادگای فیدراڵی دەزانێ مانگی حەوتی ئەمساڵ ماوەی کۆمیسیۆنی عێراق بەسەر دەچێت، بۆیە بەمەبەست پرسی هەڵبژاردن دوادەخات، تا نیشانەی پرسیار لەسەر دامەزراوە فەرمییەکانی هەرێمی كوردستان دروست ببێت.
شوان محەمەد، گوتەبێژی فراکسیۆنی پارتی لە پەرلەمانی عێراق، رایگەیاند: ”دادگای فیدراڵی بەمەبەست پرسی هەڵبژاردنی پەرلەمانی کوردستان دوادەخات، پێویستە سەرۆکایەتیی هەرێمی كوردستان و سەرۆکایەتیی حکومەت بەیاننامە دەربکەن، بە دادگای فیدراڵی و ئەنجومەنی دادوەری عێراق و فایەق زێدان بڵێن، ئەم دواخستنەی هەڵبژاردنی پەرلەمانی کوردستان کێشە دروست دەکات، ئەمە ئەجێندانی لەپشتەوەیە و بەرپرسیارێتییەکەشی دەکەوێتە ئەستۆی ئێوە و نیەتەکەتان باش نییە، پێمان بڵێن بۆ دوای دەخەن؟
راشیگەیاند: ”ئەگەر دادگای فیدراڵی بیەوێ ئێستا تا سبەی پرسی هەڵبژاردنی پەرلەمانی کوردستان یەکلایی دەکاتەوە، بەڵام بەڕاستیی دواخستنی زۆر بێمانایە، لەگەڵ درۆنگرتنە فڕۆکەخانەی هەولێر، بڕینی مووچە و بودجەی کوردستان، پەشیمان بوونەوە لە رێککەوتنەکان و هەمووی یەک پاکێجە بۆ فشارخستنە سەر هەرێمی کوردستان تا رادەستیان ببێت، بەڵام ئەمانە پەندیان لە مێژوو وەرنەگرتووە و دیارە کورد ناناسن، کورد رادەستی سەدام نەبوو، ئێستا دەیانەوێ بە دادگای فیدراڵی ئەم یارییانەمان لەگەڵ بکەن؟”.
باسی لەوەشکرد، ”دادگای فیدراڵی دەزانێ مانگی حەوتی ئەمساڵ ماوەی کۆمیسیۆنی عێراق بەسەر دەچێت، بۆیە بەمەبەست پرسی هەڵبژاردن دوادەخات، تا نیشانەی پرسیار لەسەر دامەزراوە فەرمییەکانی هەرێمی كوردستان دروست ببێت،
لە کۆتایی لێدوانەکەشی گوتی:” هەر شتێک ببێتە هۆکار بۆ لاوازکردنی هەرێمی كوردستان ئەمانە پەنای بۆ دەبەن، ئەو بیرە شۆڤێنییە و دژایەتییکردنە، نەک بیری پێکەوەژیان و مامەڵەکردن لەگەڵ هەرێمێکی سەربەخۆ.“
