شاخەوان عەبدوڵڵا: چارەسەری ریشەیی بۆ کێشەی جووتیارانی پەلکانە دەکرێت
ئەمڕۆ چوارشەممە دوای سەردانیکردنی گوتی پەلکانە، د. شاخەوان عەبدوڵڵا، جێگری سەرۆکی پەرلەمانی عێراق لە کۆنگرەیەکی رۆژنامەوانیدا رایگەیاند، ئەمڕۆ ئامادە بوونمان دووپاتکردنەوەیە لەسەر چارەسەری کێشەکان، دوێنێ پەیوەندیم بە سەرۆکی عەشیرەتی شەمەر کرد و لە نزیکەوە سەردانی پەلکانەشم کردووە”.
گوتیشی: “جەختم لەوە کردووەتەوە هەموو پێکهاتەکانی کەرکووک، هەموو ئەندامانی ئەنجومەنی نوێنەرانی کەرکووک، بەشێوەیەکی ریشەیی کێشەکان چارەسەر بکەن، دووپاتی دەکەمەوە دووبارە، “نەک لەبەر ئەوەی ئێوە مافەکانتان زامن کراوە و قەرەبوو بکرێنەوە، نەخێر. ئەمجارە هەنگاوی کردەیی لە دەسەڵاتی یاسادانان و لە حکوومەتیش بۆ چارەسەرکردنی کێشەکان و هەڵوەشاندنەوەی بڕیارەکانی “سەرکردایەتی شۆرش سەردەمی رژێمی بەعس” گیراوەتەبەر.
دەشڵێت: “خوێندنەوەی یەکەم کراوە بۆ چارەسەرکردنی کێشەکان لە هەر حاڵەتێکدا، ئێمە وەکو ئەندامانی ئەنجومەنی نوێنەران، لەگەڵ ئەوەداین کێشەی هەموو لایەنەکان چارەسەر بکرێن، چونکە هەیە پشێوی فیتنە دروستدەکات لە ناوچەکە ناتوانین چارەسەری بکەین، بۆیە دووپاتی دەکەمەوە چارەسەرەکە لەدەستی ئێمەدایە وەک ئەندامانی ئەنجومەنی نوێنەران وەکو شێخەکان، توانای ئەوەمان هەیە کێشەکان چارەسەر بکەین”.
شاخەوان عەبدوڵڵا ئەوەشی گوت، “دەمانەوێت گوێبیستی ئەوەبین کە ئێوە داوای دەکەن لە ئێمە، هەر بۆیە وەکو سەرۆکایەتی ئەنجومەنی نوێنەران، ئەمڕۆ چارەسەری ریشەیی کێشەکان دەکەین”.
لە کۆتایی قسەکانیشی گوتی، “رێگری کردن لە جووتیاران، چارەسەری کێشەکان ناکات و چارەسەریش لای ئەوان نییە، هەروەها لەلای سەرکردایەتی ئەمنییش نییە، بەڵکو لای دەوڵەت و لای ئێمەیە. ئێمەش بەرپرسیارێتی دەگرینە ئەستۆ بۆ چارەسەری کێشەکانی ناوچەکە”.
