سەرۆک بارزانی پێشوازی لە باڵیۆزی فەڕەنسا لە عێراق دەکات
![](https://xwakurk.com/wp-content/uploads/2024/06/20240609_172859.jpg)
رۆژی یەکشەممە 9ی حوزەیرانی 2024، سەرۆک مەسعود بارزانی پێشوازی لە بەڕێز پاتریک دۆرێل باڵیۆزی فەڕەنسا لە عێراق کرد.
لە دیدارەکەدا باس لە بارودۆخی سیاسی و ئەمنی عێراق و رۆژهەڵاتی ناوەڕاست بە گشتی و ئاڵنگاری و ئاستەنگەکانی بەردەم سەقامگیری ناوچەکە کرا.
هەر لەو دیدارەدا رۆشنایی خرایە سەر پەیوەندی دۆستانەی نێوان هەرێمی کوردستان و فەڕەنسا و بەردەوامی و بەرەوپێشەوە بردنی پەیوەندی دۆستانەی نێوان هەردوولا بە گرنگ زانرا.
هەروەها سەرۆک بارزانی سوپاسی فەڕەنسای کرد و ئاماژەی بەوەدا کە گەلی کوردستان هەرگیز رۆلی دۆستانە و ئیجابی گەل و حکومەتی فەڕەنسا لەبیر ناکات کە لە قۆناغە سەختەکاندا هاوسۆز و پاڵپشتی گەلی کوردستان بوون، و هەروەها باسی لە هەڵوێستی سەرۆک فرانسوا میتران کرد لە پشتگیری و بەدەنگەوەهاتنی گەلی کورد لە ساڵی 1991 و هەوڵدانیان لە دەرکردنی بڕیاری 688ی ئەنجومەنی ئاسایش و دروستکردنی ناوچەیەکی ئارام و پاراستنی گەلی کوردستان.
لە کۆتایی دیدارەکەدا باس لە هەڵبژاردنی پەرلەمانی کوردستان کرا کە بڕیارە ئەمساڵ ئەنجام بدرێت و جەخت لە پێویستی بەڕێوەچوونی هەڵبژاردنێکی پاک و بێگەرد کرایەوە.