راگەیاندراوێک لە پارێزگارى هەولێرەوە

پارێزگاری هەولێر راگەیاندراوێکی لە بارەى دەستگیرکردن و ئاشکراکردنى تاوانبارانى سووتاندنى بازاڕى لەنگە و قەیسەری بڵاوکردەوە کە ئەمەی خوارەوە دەقەکەیەتی:

بەناوى خوداى بەخشندە و میهرەبان

دوای ئەوەی لە ماوەى ڕابردوودا چەند ڕووداوێکى ئاگر کەوتنەوە لە شارى هەولێر ڕوویدا، کە دواین ڕووداو ئاگرکەوتنەوەکەى شەوی 2024.5.5ى بازاڕی قەیسەری شاری هەولێر بوو، سوپاس بۆ “خودا” جگە لە زیانی ماددی هیچ زیانێکی گیانی لێنەکەوتەوە، هەر ئەوکات ڕامانگەیاند، لەو ئاگرانە بە گومانین ڕووداوی سروشتی و ئاسایی بووبێت، هەربۆیە هاوشاریان و هاوڵاتییانى خۆشەویستى شارەکەمان و دوکاندار و کاسبکارانى زیانلێکەوتووى بازاڕەکانمان دڵنییا کردووە، دەست بە ڵێکۆڵینەوە کراوە لە هۆکارى کەوتنەوەى ئاگرەکە و هەر کاتێک ئەنجامی لێکۆڵینەوەکان بە کۆتاهات، هەر کەس و لایەنێک لە پشتەوەى ئەو کارە بووبێت چاوپۆشی لێ ناکرێت و ئەنجامدەری تاوانەکە بۆ ڕای گشتی ئاشکرا دەکەین.

سوپاس بۆ هەردوو وەزارەتی ناوخۆی حکومەتى هەرێمى کوردستان و حکومەتى عێراق و هێزەکانى ئەنجومەنى ئاسایش و دژەتیرۆرى کوردستان و ئاژانسى هەواڵگریى فیدراڵ و ئاسایش و پۆلیسى هەولێر، کە توانیان لە ماوەیەکى کەمدا و بە هاوبەشى لەگەڵ یەکتر ئەو تۆڕە تاوانکاریە تیرۆرستیە ئاشکرا بکەن و دەستگیریان بکەن کە یەکێکیان سەرپەشتیارى تاقمەکەیە بەناوى “هونەر فەخرەدین ئەحمەد” کارمەندی یەکەی حەفتایە و ئەوەی دیکەشیان “محەممەد نەجات حەسەن” ئەفسەری دژە تیرۆرە لە سلێمانی (CTG) و لەلایەن ڕاهێنەرانی چەکدارانی “پەکەکە” ڕاهێنانیان پێکراوە تاکو ئەو کارە تیرۆریستییانە ئەنجامبدەن و زیان بەهاووڵاتییانی شارەکەمان و، شارەکانى دیکە دهۆک و کەرکووک و چەند ناوچەیەکی تر بگەێنن.

ئامانجى ئەو تۆڕە تاوانکارەی “پەکەکە”، کە بەشێوەیەکى بەرنامە بۆ داڕێژراو و رێکخراو تێکدانى ئارامى و ئاسایشى هەولێرى پایتەخت و لێدان لە ئابووریی و بڕینی سەرچاوەی قووتی هاووڵاتییانى شارەکەمان بووە، جگە لەوەش لە دانپێدانانەکانیان ئاشکرایان کردووە لە بەرنامە و پیلانیان دابووە وێڕاى سووتاندنی بازاڕەکانی لە نگە و قەیسەری، شوێنى دیکەى هەولێریش بە هەمان شێوە بسووتێنن، لەوانە (بازاڕى میللی و شوێنى بازرگانى و کێڵگەى کشتوکاڵى و پاڵاوگە و شوێنە گەشتیاریەکانى شەقلاوە و سیروان مۆڵ و هێڵى گواستنەوەى کارەبا).

ئەو گرووپە تیرۆرستییە، مەرامیان بوو گورزی کوشندە لە ئابووری هەموو خەڵک بدەن و دەست لە هیچ بازاڕ و شوێنێکى هەولێرى پایتەخت نەپارێزن و زیانى گەورە بە ژێرخانی ئابووری شارەکەمان بگەیەنن، بەڵام سوپاس بۆ خودا، کە توانرا بە لێهاتوویی و چاوکراوەیی هێزە ئەمنیەکان هەر زوو ئەو دەستە ڕەشە نەگریسە ئاشکرا بکرێت و تاونباران و ئەوانەشى لە پشت ئەو کارە تیرۆرستییە قێزەوەنە بوون ڕووى ڕەشیان بدۆزرێتەوە و بە سزایی عادیلانەى خۆیان بگەن.

لێرەوە جارێکى دیکە، دەستخۆشی لە هێزە ئەمنیەکانى هەردوو وەزارەتى ناوخۆى حکومەتى هەرێم و حکومەتى عێراقى فیدراڵ دەکەین و هاووڵاتییان و هاوشاریانی خۆشەویستی شارەکەشمان دڵنییا دەکەینەوە، وەک هەمیشە لە خزمەتی ئێوەدا دەبین و بە پشت بەستن بە توانا و چاووکراوەیی هێزە ئەمنیەکان، شەو ڕۆژ دەخەینە سەریەک بۆ پاراستنی سەلامەتی و پارێزگاریکردن لە سەر و ماڵیان، داواش لەو کاسبکار و دوکاندارانە دەکەین کە بەهۆى ئەو ڕووداوە تیرۆرستییەوە زەرەرمەندبوونە، لە نزیکترین بنکەکانی پۆلیس و لە دادگا سکاڵا لە سەر ئەو تیرۆرستانە تۆمار بکەن، بۆ ئەوەی باجی قورسى ئەو زیانانە بدەن کە بە قوت و ماڵ و موڵکی هاووڵاتییانیان گەیاندووە.

لە ئێستاشدا وێڕاى نۆژەنکردنەوەى بازاڕى لەنگەى شارى هەولێر کە لە قۆناغى کۆتایدایە، لە هەردوو بەشى بازاڕی قەیسەری، قەیسەریی کۆن و قەیسەریی نوێ، لە سەر فەرمان و ڕاسپاردەى ڕێزدار مەسرور بارزانى، سەرۆکى حکومەتى هەرێمى کوردستان و بە گوژمەی (پێنج ملیار و 300 ملیۆن دینار) لە سەر بودجەی پارێزگای هەولێر، نۆژەنکردنەوەى بازاڕەکە لە رێگەی دوو کۆمپانیاوە و بەکارکردنى سێ شیفت و بە شەو و رۆژ نۆژەنکردنەوەى بازاڕەکە بەردەوامە، هەموو هەوڵێکى خۆشمان خستۆتەگەڕ بۆ ئەوەى لە نزیکترین کاتدا و بەر لەوادەى تەواوبوونى ماوەى پڕۆژەکە، نۆژەنکردنەوەى بازاڕەکە بە کۆتابێت و لە زووترین کاتدا ئەوبەشەى بازاڕى قەیسەرى بە ڕووى هاوڵاتییان بکرێتەوە و کاسبکار و دوکاندارانى زیانلێکەوتووش بگەڕێنەوە سەرکار و کەسابەتى خۆیان.

ئومێد خۆشناو

پارێزگارى هەولێر