سەرۆک بارزانی پێشوازی لە کونسوڵی نوێی توورکیا لە هەولێر دەکات
رۆژی چوارشەممە 10ی تەمووزی 2024، لە سەڵاحەددین سەرۆک مەسعود بارزانی پێشوازی لە بەڕێز ئێرمان تۆپچو کونسوڵی نوێی توورکیا لە هەولێر کرد.
لە دیدارەکەدا کونسوڵی نوێی تورکیا لە هەولێر سڵاو و رێزی وەزیری دەرەوەی توورکیای بە سەرۆک بارزانی گەیاند و جەختی لەوە کردەوە کە وڵاتەکەی خوازیاری ئەوەیە باشترین پەیوەندی لە بوارە جۆراوجۆرەکاندا لەگەڵ هەرێمی کوردستاندا هەبێت. لە بەشێکی تری ئەو دیدارەدا بیروڕا لەبارەی سەردانەکەی سەرۆک بارزانی بۆ بەغدا ئاڵۆگۆڕ کرا و کونسوڵی توورکیا ئەو سەردانەی بە مێژوویی و کاریگەر وەسف کرد.
هەر لەو دیدارەدا سەرۆک بارزانی وێڕای باسکردنی هۆکارەکانی سەردانی حەفتەی رابردوو بۆ بەغدا ئەوەشی دووپات کردەوە کە لێکتێگەیشتن و دیالۆگ لە چوارچێوی دەستوور باشترین رێگەیە بۆ چارەسەرکردنی کێشەکان. هەروەها هیوای سەرکەوتنی بۆ کونسوڵی تازەی توورکیا خواست لە ئەرک و کارەکانیدا.
بارودۆخی سیاسی و دوا پێشهاتەکانی عێراق و ناوچەکە تەوەری تری ئەو دیدارە بوو.
