ئەندامێكی كوتلەی عەرەبی لە كەركووك: یەكێتی تەنازولی لە مافەكانی كورد كرد بۆ ئێمە
لە میانی دیدارێكیدا لەگەڵ كەناڵێكی عێراقی، ئەندامێكی كوتلەی عەرەبی لە ئەنجوومەنی پارێزگای كەركووك ئاشكرای كرد، یەكێتیی نیشتمانیی كوردستان لە بەرامبەر ساڵێك و چوار مانگی پۆستی پارێزگاری كەركووك، تەنازولی لە مافەكانی كورد كردووە بۆ پێكهاتەی عەرەب، بۆیە لەگەڵیدا ڕێككەوتوون.
رەعد ساڵح، ئەندامی ئەنجوومەنی پارێزگای كەركووك لە كوتلەی عەرەبی، لە میانی چاوپێكەوتنێكیدا لەگەڵ كەناڵی (الاولی)ی عێراقی رایگەیاند، كاتێك ئەوان لە 4ی ئابی 2024 هاتوونەتە هەولێر بۆ دیداری سەرۆك بارزانی، بەو نیازە هاتوون كە گەڕی یەكەمی پۆستی پارێزگاری كەركووك بۆ پێكهاتەی عەرەب بێت، ”بەڵام شۆك بووین لەو كاتەدا بەوەی كە گەڕی یەكەم بۆ پێكهاتەی كورد دەبێت. پاش دەرچوونیشمان لە بارەگای بارزانی و دانیشتنمان لەگەڵ بەڕێز شاخەوان عەبدوڵا و دانوستانكاران، داوای پۆستی فەرماندەی پۆلیسی كەركووك و 32%ی فەرمانگەكانیان بۆ پێكهاتەی كورد دەكرد“
ئەو سەركردە عەرەبە نەیشاردەوە كە ڕێككەوتنیان لەگەڵ پارتی بەپێی ئەوەی كە پارتی داوای دەكرد، لە بەرژەوەندیی پێكهاتەی عەرەب نەبووە، چونكە پارتی داوای زیاتر لەوەی دەكرد كە یەكێتی داوای كردبوو، بۆیە چوون و لەگەڵ یەكێتیی نیشتمانیی كوردستان و بابلیون ڕێككەوتوون، ”بەوەی كە یەكێتی تەنازول لە ژمارەیەك لە پۆستەكانی وەك فەرماندەیی پۆلیسی كەركووك و فەرمانگەكانی دیكە دەكات، بەرامبەر بەوەی بۆ گەڕی یەكەم پۆستی پارێزگاری كەركووك لای یەكێتی بێت.“
رەعد ساڵح ئاشكرای كرد كە بەپێی ڕێككەوتنەكەی ئێستا، رێبوار تەها تاوەكوو 31ی 12ی 2025 لە پۆستی پارێزگاری كەركووك دەمێنێتەوە، لە 1ی 1ی 2026ەوە كەسێكی توركمان دەبێتە پارێزگار تا كۆتایی هەمان ساڵ، دواتریش لە 1ی 1ی 2027 تا هەڵبژاردنی تازەی ئەنجوومەنی پارێزگای كەركووك دەكرێت، پۆستەكە لای پێكهاتەی عەرەب دەبێت.
ئەو ئەندامە عەرەبەی ئەنجومەنی پارێزگای كەركووك ئەوەشی دووپات كردۆتەوە كە ”ڕێككەوتن لەگەڵ یەكێتی هەیە لەسەر تەنازولكردن لە مافەكانی كورد لە ئیدارەدانی فەرمانگەكانی وەك (فەرماندەیی پۆلیس، وەبەرهێنان، پەروەردە، كشتوكاڵ، گەنجان و وەرزش و ئاو) لەگەڵ تەنازولكردن لە ئیدارەدانی قەزاكانی دوبز و داقووق و حەویجە و ناحیەكانیان. ئەم ڕێككەوتنە خواستی ئێمە پڕ دەكاتەوە و داواكارییەكانمان وەك پێكهاتەی عەرەب لەخۆ دەگرێت.“
ئەمە لە كاتێكدایە كە پێشتریش موهەیمەن حەمدانی، سەركردەی عەرەبی سوننەی كەركووك ئاشكرای كردبوو كە لە كۆبوونەوەكەی پیرمامدا سەرۆك بارزانی راشكاوانە پێی گوتوون، ئەگەر بیانەوێ گەڕی یەكەم پۆستی پارێزگاری كەركووك لای عەرەب بێت، ئەوا لەگەڵیان ڕێك ناكەوێت.
جەختیشی كردۆتەوە كە سازش لە هیچ پێگەیەكی كورد لە كەركووك ناكرێت.
