سەرۆك بارزانی پێشوازی لە سەرۆكی كەنیسەی كلدان لە عێراق و جیهان دەكات
رۆژی پێنجشەممە 22ی ئابی 2024، لە سەڵاحەددین سەرۆك مەسعود بارزانی پێشوازی لە غیبتەی پاتریارك كاردینال مار لویس رۆفائێل ساكۆ سەرۆكی كەنیسەی كلدان لە عێراق و جیهان و شاندێكی یاوەری كرد.
لە دیدارەكەدا سەرۆكی كەنیسەی كلدان لە عێراق و جیهان ستایشی رۆڵی سەرۆك بارزانی كرد لە هەوڵەكانی بۆ پاراستنی پێكهاتەی كریستیان و پاڵپشتیكردنی داواكارییەكانیان و پێدانی دڵنیایی بۆ گەرەنتیبوونی ئاییندەیان لە هەرێمی كوردستان و عێراق و ڕرشیگەیاند كە كریستیانەكانی دەروەی عێراق و هەرێمی كوردستانیش سوپاسگوزاری هەڵوێستەكانی سەرۆك بارزانین.
هەر لەو دیدارەدا سەرۆك بارزانی وێڕای بەخێرهێنانی سەرۆكی كەنیسەی كلدان لە عێراق و جیهان و شاندی یاوەری، رایگەیاند كە كریستیانەكان و سەرجەم پێكهاتە ئاینی و نەتەوەییەكانی كوردستان وەك بەشێك لە گەلی خۆمان دەزانین و بە هەموو شێوەیەك بەرگری لە مافەكانیان دەكەین و ئەوە لەلای ئێمە وەك پڕەنسیپێكی نەگۆڕە.
بارودۆخی سیاسی عێراق و دۆخی كەركووك و چەند بابەتی پەیوەست بە پێكهاتەكان تەوەری تری ئەو دیدارە بوون.
