وەزیری ناوخۆ: بۆ بابەتی مووچە بەغدا بیانووی ئیداریی نەماوە بۆیە دەڵێن بەشی كوردستان هەر ئەوەندەیە
لەبارەی مووچەوە وەزیری ناوخۆی حكومەتی هەرێمی كوردستان رایگەیاند، بابەتی مووچە بۆ برسیكردنی گەلی كوردستانە و بەغدا بیانووی ئیداریی نەماوە، بۆیە دەڵێن بەشی كوردستان هەر ئەوەندەیە.
ئەمڕۆ پێنجشەممە 5ی 11ی 2024، ڕێبەر ئەحمەد وەزیری ناوخۆی كوردستان، لە كۆنگرەیەكی رۆژنامەوانیدا لە هەولێر ڕایگەیاند، بابەتی مووچە هیچ بیانوویەكی ئیداری و دارایی تێدا نەماوە و هەموو كێشەكان چارەسەر كراون، بۆیە بەغدا ئێستە قسەكەی گۆڕیوە و دەڵێن، بەشی هەرێمی كوردستان هەر ئەوەندەیە و پارەی تر نادەین، لە كاتێكدا مووچە لە هیچ كوێ و هیچ كاتێك ئاوا نەبووە و دەبێت مانگانە بدرێ.
وەزیری ناوخۆ دووپاتیشی كردەوە كە ئیتر خەڵك و ئێمەیش بێزار بووین لەم هەڵسوكەوتانە، هیوادارین بە زووترین كات مووچەی مانگانە لە كاتی خۆیدا بدرێت و ئەم برسیكردنەی گەلی كوردستان هەر كەسی لە پشت بێت هەڵە دەكات، چونكە حكومەتی هەرێم هەرچی لەسەر بووە كردوویەتی و ئەوەی بەغدایش دەیڵێ ڕاست نییە، چونكە بیانووەكانیان بنبڕ كراوە، بۆیە قسەی خۆیان گۆڕی و دەڵێن پارە هەر ئەوەندەیە بۆ هەرێم.
روونی كردەوە، حكومەتی هەرێم لەسەر هێڵە بۆ چارەسەركردنی مووچە لەگەڵ بەغدا، هەروەها بیانووەكانی بەغدا بۆ نەناردنی مووچە پەسند نین.
