یەكێتی لە سلێمانی كوڕەشەهیدێكی رۆژهەڵات بێسەروشوێن دەكات
رفاندن و رادەستكردنەوەی كوردانی رۆژهەڵات لەلایەن یەكێتی بەردەوامە و دوای ئەوەی كوردێكی ڕۆژهەڵات کە کوڕە شەهیدە بە ناوی جیهانبەخش گۆشخانی لە سلێمانی لەلایەن یەكێتییەوە دەڕفێندرێت و شوێنەون دەكرێت، لە گرتەیەکی ڤیدیۆییدا هاوسەرەكەی بانگەوازێك بۆ ئازادكردنی بڵاو دەكاتەوە.
لە گرتە ڤیدیۆکەدا خاتوو خانم، هاوسەری ڕفێندراو جەهانگیر گۆشخانی رایگەیاندووە: “مێردەكەم لە ڕۆژی سێشەممە، لە ئاسایشی كانی گۆمە لە سلێمانی دەستگیر كراوە، لە كاتێكدا لەسەر ئیش بووە و پێشووتریش ئاسایش هیچ ئاگاداركردنەوەیەكی بۆ نەناردووین.”
راشیگەیاندووە: “نزیكەی هەفتەیەكە دێین و دەچین، هیچمان بۆ نەكرا و كەیسەكەی مێردەكەم بەلاڕێدا دەبەن، تەنانەت پارێزەرمان گرتووە و ڕێگری دەكەن لەوەی كاری خۆی بكات، دادوەر بانگی تۆمەتبار دەكات و چەكدارانی یەكێتی ناهێڵن بچێتە بەردەم دادگا.”
دەشڵێت: “چوومەتە ئاسایشی سلێمانی، پێیان گوتم تا دوو مانگی دیكە مێردەكەت نابینی و وازی لێ بێنە، بەبێ ئەوەی هۆكاری گرتنەكەیم پێ بڵێن و بۆم ڕوون بكەنەوە. مێردەكەم كێشەی لەگەڵ كەس نییە، لە بنەماڵەی شەهیدە و تەنیا کێشەی لەگەڵ کۆماری ئیسلامیی ئێران هەیە.”
لای خۆشیەوە ڕۆژنامەنووس عەلی جەوانمەردی، رایگەیاند:” جەهانگیر گۆشخانی، پەنابەری هەڵگری کارتی یوو ئێنە و کوڕەشەهیدی حدکایە و تا ئێستا زیانی بۆ یەکێتی نەبووە، ئەگەر یەکێتی شتێکی لەسەری هەیە با بڵاوی بکاتەوە، ئەگینا ئێمە بەڵگەی گیرانی ئەو پەناخوازە بڵاو دەکەینەوە.”
