سیستەمی مووچە لە تەواوی کوردستان دێتە گۆڕین و لە مانگی داهاتوو پەیڕەو دەکرێت

ئەنجومەنی وەزیرانی هەرێمی کوردستان لەپێناو ڕێکخستن و بنبڕکردنی کێشەکان و نەهێڵانی ڕۆتین، سیستەمێکی نوێ بۆ ئامادەکردنی لیستی مووچە پەیڕەو دەکات و لە سەرجەم دامودەزگاکان جێبەجێی دەکات و وەزارەتی دارایی و سەرجەم گەنجینەکانیش ئاگادار کرانەوە.

لە نووسراوێکی فەرمیدا کە وێنەیەکی دەست دەزگای میدیایی خواکوڕک کەوتووە، رۆژی 23 ی 12 ی 2024 لە ئەنجومەنی وەزیرانی هەرێمی کوردستان دەرچووە و ئاراستەی وەزارەتی دارایی کراوە تێدا سەرجەم وەزارەت و دام و دەزگاکانی حکومەت ئاگادار کراونەتەوە کە نووسراو بۆ (فەرمانگەی تەکنەلۆجیای زانیاری) بکەن، تاوەکو لاپتۆپی تایبەت بۆ کارمەندی پەیوەست بە کاروباری مووچە لە وەزارەت یان فەرمانگەکە دابین بکرێت، لە داهاتوودا لیستی مووچە بە شێوەی ئەلیکترۆنی لە هەموو دام و دەزگاکان بە یەک شێواز و لەیەکدا کات مووچە بنێرن، تاوەکو بیانووی درەنگ گەیشتنی لیستی مووچە نەمێنێت.

هەر لە نووسراوەکە هاتووە :” بڕیارماندا لە مانگی کانوونی دووەمی 2025 و مانگەکانی دواتر کار بەم سیستەمە بکرێت و هیچ سیستەمێکی دیکە بۆ لیستی مووچە کاری پێ نەکرێت لەلایەن گەنجینەکانەوە .