چوار بڕیار بۆ هێزەکانی پێشمەرگە دەرچوو
بەگوێرەی راگەیاندراوێك کە ئەمڕۆ پێنجشەممە وەزارەتی پێشمەرگەی حکومەتی هەرێمی کوردستان، بڵاویکردۆتەوە رایگەیاندووە :” رێگریی دەكرێت لە بڵاوكردنەوەی هەموو جۆرە پۆستێك لە تۆڕە كۆمەڵایەتییەكاندا، كە نمایشكردنی ئەفسەر و فەرماندەكانی هێزی پێشمەرگە بێت بە جلوبەرگی سەربازییەوە، بەو مەبەستەش لەلایەن بەڕێوەبەرایەتیی گشتیی راگەیاندن و بەڕێوەبەرایەتیی گشتیی هەواڵگریی پێشمەرگە، بەدواداچوونی بەردەوام بۆ ئەو بابەتە دەكرێت.
راگەیەندراوەکەی وەزارەتی پێشمەرگە لە چوار خاڵ پێکهاتووە و تێیدا هاتووە، :” هەموو جۆرە پۆست و بڵاوکردنەوەی هەرجۆرە نمایش و خۆ دەرخستنێک بە شێوەیەک چالاکی کەسی ئەفسەر و فەرماندە و پێشمەرگە لە تۆڕە كۆمەڵایەتییەكاندا قەدەغەیە.
راشیگەیاندووە، لەسەر هەموو جۆرە ناو زڕاندنێك لە تۆڕە كۆمەڵایەتییەكاندا، ئەنجامدەرەكەی ڕووبەڕووی سزای یاسایی دەكرێتەوە و دەدرێتە دادگای سەربازی.
لە خاڵی سێیەمدا، وەزارەتی پێشمەرگە بەڕێوەبەرایەتی گشتیی ڕاگەیاندن و بەڕێوەبەرایەتی گشتیی هەواڵگری پێشمەرگەی ڕاسپاردووە بۆ چاودێری و بەدواداچوونی بەردەوام لە بارەی هەردوو خاڵی یەکەم و دووەم.
هەورەها لە کۆتا خاڵی بڕیارەکاندا، وەزارەتی پێشمەرگە هەردوو بەڕێوەبەرایەتییە گشتییەکەی ڕاسپاردووە، هەماهەنگی لەگەڵ دەزگا ئەمنیەکان بکەن تا بەدواداچوون بۆ پەیجە ساختەکان و نادیارەکان بکەن، کە سوکایەتی بە ناو ناوبانگی پێشمەرگە و فەرماندە سەربازییەکان دەکەن.
